SKÝRSLAN: Baráttuleikur í Grafarvogi
Hvað réði úrslitum?
Fyrri hálfleikurinn réði einfaldlega úrslitum í þessum leik, Ólsarar voru miklu betri og náðu taki á leiknum sem þeir misstu aldrei.
Bestu leikmenn
1. Martin Cristian Kuittinen
Það var erfitt að gera upp á milli sóknarmanna Víkinga í þessum leik, þeir áttu allir stórgóðan leik en Martin stendur upp úr. Skoraði gott mark og var flottur með boltann.
2. Harley Willard
Þetta hefði alveg eins getað farið til Sallieu Tarawallie en ég gef Willard þetta. Hann var frábær með boltann og fór skemmtilega framhjá varnarmönnum og var nálægt því að skora sjálfur nokkrum sinnum ásamt þess að eiga góðar sendingar sem bjuggu til góð færi.
Atvikið
Fyrsta mark leiksins, þrumufleygur frá Sallieu Capay Tarawallie sem setti tóninn fyrir gestina sem að áttu frábæran leik í blíðunni í Grafarvoginum.
Hvað þýða úrslitin?
Víkingur Ó. fer á toppinn í deildinni ásamt Fjölnismönnum. Ólsarar eiga þó leik til góða og eru því í góðri stöðu.
Vondur dagur
Sóknarmenn Fjölnis áttu ekki góðan dag, kantmennirnir sáu lítið af boltanum og eina mark liðsins kom úr vítaspyrnu. Þeir þurfa að gera betur í svona stórum leikjum.
Dómarinn - 8
Flott frammistaða hjá honum, það var mikil harka í þessum leik en hann leyfði leiknum að fljóta og hélt sinni línu vel.