SKÝRSLAN: HK rúllaði yfir hikandi toppliðið
Hvað réði úrslitum?
Það hefur verið magnað að fylgjast með HK-ingum undanfarnar vikur og í dag héldu þeir áfram að toppa sig með því að sigra topplið KR örugglega í Kórnum. Þéttur varnarleikur og beittar skyndisóknir skiluðu HK-ingum þremur mörkum á fyrstu tuttugu mínútunum. Eftir það varðist liðið gífurlega vel og sigldi fimmta sigrinum í hús í síðustu sex leikjum! KR-ingar voru hikandi öllum aðgerðum og toppliðið náði sér alls ekki á strik í dag.
Bestu leikmenn
1. Birnir Snær Ingason - HK
Binni bolti elskar að spila innandyra og hann sýndi sínar bestu hliðar í dag. Stimplaði sig inn með marki í fyrsta byrjunarliðsleik með HK áður en hann lagði upp síðasta markið að auki.
2. Arnþór Ari Atlason - HK
Allir leikmenn HK skiluðu flottu dagsverki í dag og erfitt að taka menn út. Arnþór Ari spilaði aftar á miðjunni en vanalega og leysti það hlutverk með prýði. Skoraði fyrsta markið og var duglegur allan leikinn.
Atvikið
KR byrjaði leikinn á stórsókn en á sjöttu mínútu skoraði Arnþór Ari Atlason sitt fyrsta mark í sumar eftir undirbúning frá hinum efnilega Valgeiri Valgeirssyni. Þarna gaf HK tóninn því fjórtán mínútum síðar var staðan orðin 3-0!
Hvað þýða úrslitin?
HK er komið upp í 3. sæti og af fullum þunga í Evrópubaráttuna. Eitthvað sem enginn bjóst við fyrir mót! KR er áfram á toppnum, núna sjö stigum á undan Breiðabliki.
Vondur dagur
Leikmenn KR geta allir gert mun betur í dag. Tobias Thomsen og Kristján Flóki Finnbogason byrjuðu saman frammi og komust lítið áleiðis. Varnarlínan var í miklu basli, sérstaklega á fyrstu 20 mínútunum, en HK-ingar sköpuðu þá stórhættu nánast alltaf þegar þeir komust yfir miðju. Kennie Chopart og Skúli Jón Friðgeirsson vilja báðir gleyma þessum leik sem fyrst.
Dómarinn - 8
Einn og einn dómur sem menn voru ósáttir með en heilt yfir var línan fín hjá Guðmundi Ársæli og yfir engu stóru að kvarta.