SKÝRSLAN: Kamel og karakter hjá Keflvíkingum
Hvað réði úrslitum?
Fylkir leiddi verðskuldað í hálfleik og hefði getað náð stærri forystu. Siggi Raggi náði að stilla strengina fullkomlega í seinni hálfleik, Keflvíkingar tóku skyndilega yfir leikinn og horfðu aldrei til baka.
Bestu leikmenn
1. Sami Kamel - Keflavík
Filterlaus Kamel. Miðað við fyrsta leik hefur Keflavík náð í afskaplega öflugan bita í danska miðjumanninum. Var ákveðinn umferðarstjóri á miðsvæðinu, sýndi gæði sín og jafnaði leikinn með smekklegu marki.
2. Dagur Ingi Valsson - Keflavík
Hetja Keflvíkinga. Dagur var búinn að búinn að biðja um skiptingu þegar hann skoraði sigurmarkið í uppbótartíma.
Atvikið
Sigurmark Dags sem skoraði og fékk svo krampa í báða kálfana og fór af velli strax á eftir.
Hvað þýða úrslitin?
Þarna mættust tvö lið sem báðum er spáð harðri fallbaráttu í sumar. Þó ekkert ráðist í fyrstu umferð þá gætu sigrar í innbyrðis viðureignum neðstu liðanna reynst ákaflega dýrmæt þegar talið verður upp úr pokanum í lokin.
Vondur dagur
Fylkismenn fóru illa með fullt af góðum færum í fyrri hálfleik. Þeir léku vörn Keflavíkur grátt en uppskáru bara eitt mark úr vítaspyrnu. Í seinni hálfleik féll Fylkisliðið of langt til baka og menn gerðu sig seka um dapran varnarleik.
Dómarinn - 8,5
Villi Alvar og hans menn fara vel af stað á tímabilinu.