SKÝRSLAN: Breiðhyltingar í skýjunum eftir þrjá sigurleiki í röð
Hvað réði úrslitum?
Ætla að vitna í báða þjálfarana. Ég byrja á Jeffsy sem talar um þessi litlu augnablik þar sem Þróttararnir gleymdu sér varnarlega. Ekki varnarleikur upp á marga fiska. Síðan talaði Vigfús einmitt um eljuna, vinnusemina og hungrið hjá Leiknismönnunum í að vinna leiki sé mikið núna. Leiknismennirnir unnu hreinlega bara fyrir þessum sigri þrátt fyrir að hafa ekki verið með fleiri skot á markið eða meira með boltann. Leiknismennirnir, þá sérstaklega Omar Sowe, refsuðu Þrótturum harkalega.
Bestu leikmenn
1. Daníel Finns Matthíasson
Stórkostlegur í dag. Skorar eitt, vissulega úr víti en mark er mark, og leggur upp eitt. Þessi stoðsending samt var svakaleg. Líklega með þeim betri sem ég hef séð í Lengjudeildinni á tímabilinu. Fyrir utan það átti hann líka bara stórglæsilegan leik og það er alveg ljóst að þeir hefðu ekki unnið án hans.
2. Hjalti Sigurðsson
Skoraði sigurmarkið og var mjög líflegur alveg undir lokin. Það var eins og hann fann einhvern auka gír þegar það voru 5 mínútur eftir því hann var að skalla alla bolta í burtu og var að valda usla í vörn Þróttara undir lokin. Mjög góður dagur á skrifstofunni hjá Hjalta í kvöld.
Atvikið
Atvikið fyrir mig persónulega var þegar .net lá niðri í u.þ.b. 10 mínútur akkúrat þegar sigurmarkið kom hjá Hjalta. En sem betur fer reddaðist það fljótlega. Ætli atvikið sem gerðist innan vallar sé ekki þegar Daníel Finns lagði upp markið hans Omar með þessari geggjaðri sendingu.
Hvað þýða úrslitin?
Leiknismennirnir fara tímabundið alla leið upp í 4. sætið en þeir skilja Þróttarana eftir í 7. sætinu.
Vondur dagur
Erfitt að velja einvhern einn í kvöld. Get valið varnarlínu Þróttara sem svaf á verðinum nokkrum sinnum í dag eftir að hafa stjórnað leiknum gjörsamlega í seinni hálfleik. Sveinn Óli var auðvitað klaufi að taka niður Omar og gefa Leikni víti en hann hefði ekki getað varið neitt af þessum mörkum sem Leiknir skoruðu í dag. Ætla bara að setja þetta á varnarlínu Þróttara en þeir hafa ekki unnið leik núna fjóra leiki í röð.
Dómarinn - 8
Ég skal segja ykkur það að mér fannst þessi leikur vera frábærlega vel dæmdur hjá tríóinu í kvöld. Það voru nokkur brot hjá Leikni þar sem Þróttarar vildu fá spjald en ég stend með Vilhjálmi í þeim atvikum. Síðan var vítaspyrnudómurinn hárréttur og hann leyfði leiknum að fljóta bara mjög vel. Solid átta sem hann fær frá mér!