Þetta er að fara af stað! Þjóðsöngvarnir að baki. Það eru nokkrir íslenskir stuðningsmenn í stúkunni sem er gaman að sjá. Núna fer þetta senn að byrja!

Umgjörðin í kringum þennan leik er aðeins meiri og stærri en á Kópavogsvelli um daginn. Þjóðverjinn kann þetta.

Það styttist í að leikurinn fari að hefjast og stemningin á vellinum er að stigmagnast.

Bjartsýni Það ríkir bjartsýni á meðal okkar fjölmiðlamanna í Aachen. Undirritaður spáir 1-1 og Aron Guðmundsson á Vísi spáir 2-2. Jafntefli væru stórkostleg úrslit en sigur væri algjör draumur.

Upphitun er hafin Bæði lið eru mætt út á völl að hita upp. Það er að myndast mikil stemning á vellinum. Síðast þegar Ísland spilaði í Þýskalandi, þá var ógnvænleg stemning. Og ég býst við að það verði þannig aftur núna.

Með betra markahlutfall en Popp Eins og greint var frá fyrr í dag, þá er Alexandra Popp ekki með. Hún er stærsta stjarnan í liði Þýskalands og þeirra helsta sóknarvopn.

En í hennar stað kemur inn Lea Schüller, sóknarmaður Bayern München. Þar er hún liðsfélagi Glódísar Perlu Viggósdóttur, fyrirliða Íslands.

Schüller er með betra markahlutfall en Popp með þýska landsliðinu þar sem hún hefur skorað 36 mörk í 57 landsleikjum og er með 0,63 mörk að meðaltali í hverjum leik. Popp hefur skorað 67 mörk í 137 landsleikjum og er með 0,49 mörk að meðaltali í leik.

Schüller hefur á yfirstandandi tímabili skorað níu mörk í 16 deildarleikjum með Bayern en hún var næst markahæsti leikmaðurinn í undankeppni HM 2023 með 15 mörk í níu leikjum.

Schüller skoraði þegar Þýskaland vann 4-0 sigur á Íslandi í fyrra en þá kom hún inn af bekknum.

Sveindís upp á topp Svo vrðist sem Sveindís Jane Jónsdóttir verði fremsti leikmaður Íslands. UEFA stillir því þannig upp. Það verður verðugt verkefni fyrir varnarmenn Þýskalands að takast á við Sveindísi en hún missti af báðum leikjunum gegn Þjóðverjum í fyrra.

BYRJUNARLIÐ ÍSLANDS Þorsteinn Halldórsson, landsliðsþjálfari Íslands, gerir eina breytingu á byrjunarliðinu frá 3-0 sigurleiknum gegn Póllandi síðasta föstudag.

Breytingin er sú að Hlín Eiríksdóttir, leikmaður Kristianstad, kemur inn fyrir Bryndísi Örnu Níelsdóttir, leikmann Vaxjö.

Hugur í okkar konum Íslenska liðið er mætt á völlinn, voru rétt í þessu að taka samstöðufund á miðjuhringnum. Það er hugur í okkar konum og vonandi ná þær að sýna sitt rétta andlit í leiknum.

Brot úr skemmtilegu viðtali við Diljá Ýr Zomers

Talsvert öðruvísi aðstæður og mikill fjöldi á vellinum Það er óhætt að segja að aðstæður séu aðeins öðruvísi hér í Þýskalandi en á Íslandi. Það er búið að vera mjög kalt á Íslandi og var hitinn við frostmark síðasta föstudagskvöld.

Áhorfendur á leikjum í Bestu deildinni hafa þá gengið út af völlum með frosna fætur síðustu daga.

En hér í Þýskalandi er hitinn í kringum tólf gráðurnar í dag og veðrið mjög fínt. Vorið er svo sannarlega komið í Aachen og það styttist í sumar en búist er við rúmlega 20 gráðu hita núna um helgina.

Góð mæting á völlinn
Það er þá búist við góðri mætingu á Tivoli völlinn í Aachen í dag en þýska knattspyrnusambandið sagði frá því í gær að um 15 þúsund miðar væru seldir á leikinn.

Völlurinn er með pláss fyrir rúmlega 27 þúsund manns í landsleikjum og verður gaman að sjá stemninguna sem mun myndast á vellinum á eftir.

Alltaf gaman að minnast á þennan leik

Ísland aftur í bláu í kvöld

Augljóst hvaða leikmaður hræðir Þýskaland mest „Við vitum að Sveindís er einfaldlega framúrskarandi leikmaður," sagði Vivien Endemann, liðsfélagi Sveindísar Jane Jónsdóttur hjá Wolfsburg, fyrir leik Íslands og Þýskalands sem er á eftir.

Það er augljóst þegar lesið er í þýska fjölmiðla að Sveindís Jane sé leikmaður sem hræðir Þjóðverja.

Sveindís missti af síðustu tveimur leikjum gegn Þýskalandi í Þjóðadeildinni vegna meiðsla og innkoma hennar í liðið fyrir leikinn í kvöld er afar mikilvæg.

Sveindís hefur gert ótrúlega vel í að koma til baka eftir erfið meiðsli og hefur hún verið stórkostleg í síðustu tveimur leikjum Íslands gegn Serbíu og Póllandi. Í kvöld er það svo Þýskaland í öðrum leik liðsins í undankeppni EM.

„Sveindís er ekki með ógnarlegan hraða. Hún getur líka tekið rosalega löng innköst og þau eru mikið vopn," segir Endemann.

Miðvörðurinn Kathrin Hendrich talaði líka um Sveindísi fyrir leikinn. „Við verðum að vera alveg ofan í henni þegar hún fær boltann. Við megum ekki gefa henni neitt svigrúm því það er rosalega erfitt að halda í við hana þegar hún kemst á ferðina," segir Hendrich.

Langaði að fá þær aftur
Sveindís spilar í Þýskalandi með Wolfsburg en hún var spurð út í leikinn við Þjóðverja eftir sigurinn á Póllandi á dögunum.

„Við spiluðum við þær í Þjóðadeildinni og erum með tvo leiki sem við getum skoðað og bætt okkur í einhverjum hlutum frá því síðast. Við förum vel yfir það. Svo er það að taka íslensku geðveikina og vonandi ná í sigur," sagði Sveindís eftir leikinn gegn Póllandi.

„Mig langaði að fá þær aftur. Mig langaði svo að spila á móti þeim því maður þekkir svo margar þarna. Ég sé alveg mikla möguleika fyrir okkur. Mér finnst við geta strítt þeim. Þær eru með frábært lið en mér finnst við líka vera mjög góðar."

Hefði búist við því að þær myndu velja völl með allt upp á tíu Íslenska liðið æfði á keppnisvellinum, Nýja Tivoli í Aachen, í gærmorgun. Borgin er á landamærum Þýskalands og Hollands, en stelpurnar dvelja á flottu hóteli hinum megin við landamærin.

Völlurinn var ekki í sérlega góðu standi þegar stelpurnar æfðu á honum í gær.

„Aðstaðan er flott en völlurinn er mjög slakur. Það kom mér á óvart. Grasið er lélegt. Maður hefði búist við því að þær myndu velja völl með allt upp á tíu. Svona er þetta bara," sagði Glódís Perla Viggósdóttir, landsliðsfyrirliði Íslands, í viðtali í gær.

Þorsteinn Halldórsson, landsliðsþjálfari Íslands, tók undir það.

„Grasið er ekkert sérstakt, en leikvangurinn er flottur að mörgu leyti. Grasið var ekkert sérstakt."

Alemannia Aachen spilar heimaleiki sína á Nýja Tivoli og er félagið sem stendur í langefsta sæti í sinni svæðisdeild í fjórðu efstu deild. Það hefur gengið vel í ár og borgarbúar sjá fram á að sjá liðið sitt í C-deild á næsta ári.

Tíðindi af hópunum

Líklegt byrjunarlið Það er algjör óþarfi að breyta sigurliði, og sérstaklega þegar lið spilar eins vel og Ísland gerði í síðasta leik gegn Póllandi.

Við spáum því að sama lið muni gegn Þýskalandi á morgun og byrjaði gegn Póllandi í síðasta leik.

Fréttir og viðtöl í aðdraganda leiksins Ferðalagið til Aachen í gær var frekar langt en ég stoppaði á leiðinni í Heerlen í Hollandi þar sem landsliðið dvelur í aðdraganda leiksins. Þar tók ég nokkur viðtöl en þau er hægt að sjá hér fyrir neðan.

Myndir úr sigrinum gegn Póllandi

Undankeppni sem byrjaði frábærlega Ísland spilaði við Pólland síðasta föstudag á Kópavogsvelli og þar líður íslenska liðinu afar vel. Fyrri hálfleikurinn var frekar kaflaskiptur en undir lok hans sýndi Ísland mikið drápseðli og gekk frá leiknum með tveimur mörkum.

Seinni hálfleikurinn var svo mjög fagmannlegur af hálfu íslenska liðsins og skoraði Sveindís Jane Jónsdóttir frábært mark, 3-0.

Leikurinn var heilt yfir frábær hjá Íslandi. Svo sannarlega skref í rétta átt.

Góðan og gleðilegan daginn Og verið velkomnir kæru lesendur í beina textalýsingu frá leik Þýskalands og Íslands í undankeppni Evrópumótsins 2025. Ísland byrjaði undankeppnina frábærlega - á 3-0 sigri gegn Póllandi síðasta föstudag - og núna er komið að því að fylgja því eftir í leik númer tvö.