„Ég held að við höfum stigið ágætis skref fram á við. Ég sagði það fyrir verkefnið að það væri markmiðið okkar að halda áfram að taka skref fram á við sem lið. Mér fannst við gera það gegn Póllandi. Það var sannfærandi sigur og góð byrjun á þessum riðli, en þetta eru sex úrslitaleikir og það er næsti úrslitaleikur á morgun."

Leikurinn gegn Póllandi, var það með því betra sem liðið hefur sýnt á síðustu mánuðum og árum?

„Þetta var allt í rétta átt. Mér finnst þetta hafa verið þróunin á liðinu frá síðustu áramótum, alltaf skref í rétta átt. Við erum alltaf að fara lengra og lengra, og spila betur og betur. Þessi leikur var jákvæður. Ég er heilt yfir sáttur við þróunina. Þetta er á réttri leið og þú vilt sjá það. Á endanum snýst þetta alltaf um úrslit. Þróunin er fín og á meðan erum við að ná í góð úrslit."

Síðasti útileikur gegn Þýskalandi endaði afar illa en Steini er bjartsýnn á betri árangur á morgun.

„Hann verður betri. Við munum mæta í þennan leik með hug og þor, af krafti. Við þurfum að vera geðveik inn á vellinum. Þetta verður erfiður leikur. Seinni leikurinn á móti þeim í fyrra snerist um að við mættum betur inn í návígin og þorðum að halda í boltann. Við gerðum vel þar og ég vonast til að leikurinn á morgun verði enn meiri þróun frá seinni leiknum gegn Þýskalandi í fyrra. Þróun í rétta átt," sagði landsliðsþjálfarinn en hann segist ekki hafa notað síðasta útileik gegn Þjóðverjum mikið í undirbúningnum núna.

„Ekki neitt, ekki nokkurn skapaðan hlut. Við erum bara að ræða það sem við viljum gera og það sem við ætlum að gera. Fortíðin er búin og núna erum við bara að horfa áfram veginn."

Það eru möguleikar í þessari stöðu.

„Þetta snýst um það hvernig hugarfar við mætum með inn í leikinn. Það snýst mikið um það. Hversu hugrökk við verðum og hvort við séum við sjálf. Ef við sýnum það, þá eigum við fína möguleika."

Riðillinn verður áhugaverður í framhaldinu en tvö efstu liðin í honum fara beint á EM. „Ég held að þetta gæti orðið hörkubarátta í þessum riðli. Austurríki var fínt í fyrri hálfleik gegn Þjóðverjum. Þær pressuðu rosalega hátt og höfðu ekki orku í að halda út. Riðillinn verður heilt yfir mjög jafn. Þjóðverjar ættu fyrirfram að vinna riðilinn en þær þurfa að hafa fyrir öllum sigrum. Við mætum með fullt sjálfstraust á morgun og förum inn í þennan leik til að vinna, eins og alltaf."

Hægt er að sjá viðtalið í spilaranum í heild sinni.