Glódís Perla Viggósdóttir.
Eftir sigurleikinn gegn Póllandi.
Glódís Perla og Ingibjörg Sigurðardóttir.
„Við áttum góða æfingu í dag eftir að hafa ferðast í gær. Við erum klárar í þetta," sagði Glódís Perla Viggósdóttir, landsliðsfyrirliði, í samtali við Fótbolta.net í dag.
Stelpurnar okkar spila á morgun sinn annan leik í undankeppni Evrópumótsins er þær mæta Þýskalandi á útivelli. Fyrsti leikurinn var 3-0 sigur gegn Póllandi síðasta föstudag.
Stelpurnar okkar spila á morgun sinn annan leik í undankeppni Evrópumótsins er þær mæta Þýskalandi á útivelli. Fyrsti leikurinn var 3-0 sigur gegn Póllandi síðasta föstudag.
Glódís þekkir þýska liðið býsna vel þar sem hún er fyrirliði Bayern München en hvernig líst henni á að mæta þeim?
„Þær eru með gríðarlega sterkt lið og mikið af góðum einstaklingum. Þær hafa samt verið upp og niður undanfarin ár; náð frábærum úrslitum og svo verið að tapa stigum og leikjum á óvæntum stöðum. Ef við mætum með okkar besta leik þá getum við strítt þeim. Við viljum halda áfram að þróa okkar leik."
Þýskaland hóf undankeppnina gegn Austurríki á dögunum og lentu þær í vandræðum þar.
„Við erum búnar að horfa á klippur úr þeim leik. Austurríki fékk ekki mörg færi en nýttu þau vel. Þýskaland átti ekki að fá vítið sem kláraði leikinn fyrir þær. Við sjáum í þessum leik að við munum vonandi fá fær. Þær gefa stundum færi á sér og gera mistök, en við þurfum þá að vera klárar. Við þurfum jafnframt að standa fast í okkar varnarleik."
Ísland tapaði stórt gegn Þýskalandi á útivelli í fyrra en Glódís segir liðið á öðrum stað núna.
„Við sem lið erum á allt öðrum stað núna en þegar við spiluðum við þær síðast. Við höfum þjappað okkur betur saman. Það var allt annar leikur þegar við spiluðum við þær heima. Vonandi erum við búnar að taka enn fleiri skref í dag. Við viljum halda áfram að bæta okkar leik og sjá hvernig við getum útfært það á móti enn betra liði," segir Glódís.
„Það er alltaf möguleiki. Þessi íslenska geðveiki sem við tölum alltaf um verður að vera til staðar. Maður veit það alveg að fólk er yfirleitt ekki spennt að spila á móti okkur. Og það er kannski ekki af fótboltalegum ástæðum, heldur út af því hvað við erum fastar fyrir, verjumst vel og erum til í að gera allt fyrir land og þjóð. Við þurfum að gera það á morgun."
Fyrirliðinn er að mæta mörgum liðsfélögum sínum og segir hún það skemmtilegt.
„Maður þekkir þær vel og þær þekkja mig vel. Ég er vön að æfa með þeim og það er svolítið skrítið að spila á móti þeim og í einhverju mixi við leikmenn úr Wolfsburg. Þetta verður vonandi gríðarlega skemmtilegur leikur," sagði Glódís.
Hægt er að sjá allt viðtalið í spilaranum hér að ofan þar sem landsliðsfyrirliðinn ræðir meðal annars möguleika Íslands í riðlinum.
Athugasemdir
