SKÝRSLAN: Það ræður ekki kasti kylfa ef þú kíkir á leik með Gústa Gylfa
Hvað réði úrslitum?
Leiknismenn voru klókir og áttuðu sig á því að þeir voru litla liðið í leiknum í dag þrátt fyrir að bæði lið hafi byrjað illa. Þegar þeir komust yfir fóru þeir strax að tefja og nýttu hvert einasta augnablik til að ganga á klukkuna, hvort sem það var að vera lengi að taka innköst, markspyrnur, liggja meiddir eða þurfa óvænt að reima. Klókara liðið vann leikinn í dag og ljóst að handbragð Ágústar Gylfasonar er fljótt að komast á liðið. Hann tók við liðinu 15:30 í gær og fyrsti sigurinn er strax kominn í hús.
Bestu leikmenn
1. Djorde Vladisavljevic, Leiknir
Algjörlega magnaður í vörn Leiknisliðsins í dag. Henti sér hvað eftir annað fyrir boltann og kom í veg fyrir að Ólafur Íshólm í markinu hefði of mikið að gera. Trompaði svo leik sinn með frábærri vörslu á lokasekúndunni þegar hann varði frá Theódóri Óskarssyni sem var kominn einn í gegn eftir að hafa skilið Dusan eftir í rykinu.
2. Axel Freyr Harðarson, Leiknir
Ég var svolítið tregur til að gefa honum að vera næstbestur enda var Axel Freyr lengi vel ekkert spes í leiknum. Þegar leið á leikinn, og flestir menn í hans stöðu ættu að vera að þreytast, óx honum ásmegin og í tvígang sólaði hann fjóra og kom boltanum fyrir markið. Í fyrra skiptið skilaði það stoðsendingu að seinna markinu sem varð sigurmarkið í leiknum. Virkilega vel gert.
Atvikið
Á lokaandartökum leiksins slapp Theódór Ingi Óskarsson í gegnum vörn Leiknis, fór illa með Dusan Brkovic og var kominn að því að skjóta á markið þegar Djorde kom á fleygiferð, henti sér fyrir boltann og bjargaði í horn. Fylkismenn vildu fá hendi víti en það var aldrei að fara að gerast.
Hvað þýða úrslitin?
Leiknismenn sóttu sinn fyrsta sigur í sumar og sáu kannski að það er vel hægt að snúa genginu við þrátt fyrir að hafa fengið sex mörk á sig tvo leiki í röð. Þeir lyfta sér ekki bara uppúr botnsætinu heldur úr fallsæti og í 10. sætið með fyrsta sigri sumarsins. Fylkir, liðið sem átti að rúlla yfir þessa deild er bara einu sæti, og einu stigi, fyrir ofan Leikni og hefur valdið miklum vonbrigðum í sumar. Það var fátt sem gladdi augað og ljóst að verkefni Árna Freys Guðnasonar þjálfara er ærið að taka til og laga. Varnarleikurinn er oft á tíðum hörmung og liðið á í miklu basli með að skora mörk.
Vondur dagur
Eyþór Wöhler er fenginn í Fylki sem stjörnuleikmaður, framherji sem ætti að vera í Bestu-deildinni en velur að taka slaginn í Lengjudeildinni. Það á að vera krafa að svoleiðis framherji raði inn mörkunum og sér skemmtikraftur sem eftir er tekið. Eyþór gerði ekkert í þessum leik frekar en fyrri leikjum í sumar. Hann fær að spila mikið og er með 0 mörk í 6 leikjum. Það er bara dapurt.
Dómarinn - 9
Það er gaman að sjá að í fríi Bestu-deildarinnar séu bestu dómarar landsins að taka leiki í Lengudeildinni. Helgi Mikael dæmdi leikinn í dag óaðfinnanlega. Var fljótur að spjalda Leiknismenn fyrir að tefja strax á 25. mínútu, leyfði minni brot á báða bóga sem er jú mun skemmtilegra en stöðugt flaut og stýrði leiknum vel. Kórónaði svo leik sinn með lokaatvikinu þegar Djorde varðist Theódóri í lokin og sá það sem var rétt, það var engin hendi! Frábær frammistaða.