SKÝRSLAN: Sterkur sigur Þróttara en Grindavík án svara þegar á reyndi
Hvað réði úrslitum?
Bæði lið áttu sínar stundir í leiknum, en heilt yfir voru Þróttarar sterkari aðilinn – sérstaklega í síðari hálfleik, þar sem þeir keyrðu hreinlega yfir heimamenn eftir að hafa lent 1–0 undir. Það gerði svo illt verra fyrir Grindvíkinga þegar Adam Árni þurfti að yfirgefa völlinn á 61. mínútu, og með engan framherja á bekknum reyndist erfitt að svara fyrir sig.
Bestu leikmenn
1. Hrafn Tómasson
Fyrsti leikurinn í byrjunarliðinu eftir erfið meiðsli – og frammistaðan var stórkostleg. Það er augljóst að Hrafn er alinn upp hjá KR, félagi sem er þekkt fyrir góða spilamennsku, og hann sýndi það svo sannarlega í kvöld.
2. Ármann Ingi Finnbogason
Skagmaðurinn var flottur í kvöld á hægri kantinum. Skoraði gott mark og var helsta ógn heimamanna hér í kvöld. Var sérstaklega góður í fyrri hálfleik en það dró aðeins úr honum þegar líða tók á seinni. Engu að síður langbesti maður Grindavíkur í kvöld.
Atvikið
Stungusendingin frá Viktori Steinarssyni var einstaklega glæsileg og sendi nafna hans, Viktor Andra, einn í gegn á móti Matias. Afgreiðslan stóð fyllilega undir því – Viktor Andri lyfti boltanum laglega yfir markvörðinn, sem hafði kastað sér niður í von um að loka skotinu.
Hvað þýða úrslitin?
Með sigrinum í kvöld styrkir Þróttur Reykjavík stöðu sína í umspilsbaráttunni og fer upp í 4. sæti – einungis fjórum stigum frá toppi deildarinnar. Grindvíkingar sitja hins vegar eftir með sárt ennið, með sitt sjötta tap í síðustu sjö umferðum, og eru nú komnir hættulega nálægt fallbaráttunni.
Vondur dagur
Breiddin hjá Grindavík verður að teljast veikleiki liðsins í dag. Það vantaði einfaldlega leikmann af bekknum sem gat komið inn og breytt leiknum sóknarlega. Adam Árni, eini hreinræktaði framherji liðsins samkvæmt Halla þjálfara, þurfti að fara meiddur af velli á 61. mínútu, og eftir það virtist Grindavík aldrei líklegt til að skora
Dómarinn - 8
Gunnar Freyr og hans teymi dæmdu leikinn vel og höfðu góða stjórn allan tímann. Öll gul spjöld virtust eiga rétt á sér, að því er ég best sá. Engar athugasemdir eru við frammistöðuna – fagmannleg og traust