SKÝRSLAN: Keflavík er alltaf Keflavík í Njarðvík
Hvað réði úrslitum?
Það var einfaldlega meiri kraftur í Keflvíkingum í síðari hálfleik en heimamönnum. Þeir stigu á bensínið gegn nokkuð sterkri golu og nýttu sér aðstæður betur en heimamenn. Njarðvíkingar virkuðu stressaðir og þegar Keflavík skoraði og á móti blés bognuðu þeir full mikið.
Bestu leikmenn
1. Stefan Ljubicic
Tveggja marka maður en gerði svo margt annað vel. Hélt boltanum vel uppi í línu og var ólseigur í pressunni. Keflvíkingar hafa beðið eftir honum í allt sumar og ef hann ætlar að toppa núna geta Keflvíkingar alveg látið sig dreyma.
2. Marin Brigic
Hreint frábær í miðri vörn Keflavíkur og stöðvaði allt það sem nálægt teignum kom. Bætti upp fyrir sín mistök í fyrri leiknum og vel það.
Atvikið
Atburðarrásin í kringum annað mark Keflavíkur. Varnarmaður tæklar boltann til baka í fang Arons í marki Njarðvíkur en ÞÞÞ réttir upp hendina og dæmir óbeina aukaspyrnu. Dómarar notast eflaust við einhverja kriteríu til að meta svona atvik sem ég þekki ekki en frá mér séð virkaði þetta alls ekki sem viljandi sending til baka. Keflavík skorar svo upp úr spyrnunni og tekur forystu í einvíginu.
Hvað þýða úrslitin?
Keflavík fer í úrslit gegn HK og á möguleika á sæti í Bestu deildinni að ári. Eðli málsins samvæmt er tímabili Njarðvíkur lokið og enn og aftur verður það ekki liðið í 2.sæti sem fylgir sigurvegara deildarinnar upp í Bestu deildina.
Vondur dagur
Sárt er það fyrir Njarðvíkinga að falla úr leik eftir að hafa unnið útileikinn. Það vantaði samt eitthvað upp á andlegu hliðina í dag og dagurinn var bara ekki þeirra. Það er eitthvað sem Gunnar Heiðar og þjálfarateymið eiga sína sök á líka en leikmenn verða að horfa í eigin barm fyrir því.
Dómarinn - 5
Hvorki né leikur hjá Þórði og teyminu eins og ég horfi á hlutina. Er alls ekki sannfærður og sendingu til baka og óbeina aukaspyrnu í marki tvö ásamt því að mér fannst línan stundum á full mikilli hreyfingu hjá honum. Ekkert hræðilegt en ekki til útflutnings heldur.