SKÝRSLAN: Falldraugurinn elti KR norður
Hvað réði úrslitum?
Eftir að hafa gengið í svefni á löngum köflum í fyrri hálfleik, þá tóku KA menn við sér í þeim síðari og þá sér í lagi Birnir Snær Ingason. Hann var mikið í boltanum og samstarf hans og Hallgríms Mars verður öflugara með hverjum leiknum sem líður. KR-ingar að sama skapi voru betri aðilinn í fyrri hálfleik og leiddu verðskuldað, en rotuðust við jöfnunarmark Birnis og KA menn gengu á lagið. Þeir reyndu hvað þeir gátu að opna vörn KA eftir það, en færin voru ekki mörg gegn þéttum heimamönnum sem að kláruðu svo dæmið endanlega í uppbótartíma.
Bestu leikmenn
1. Birnir Snær Ingason (KA)
Trekktist í gang í hálfleik. Hallgrímur Jónasson sagðist hafa hækkað róminn inni í búningsklefa og það kveikti á sóknarmanninum hæfileikaríka. Hann var frábær í síðari hálfleik og hefði getað fullkomnað þrennuna í uppbótartíma, en Arnar Freyr varði vel frá honum. Skínandi góður.
2. Aron Sigurðarson (KR)
Skoraði tvö glæsileg mörk í dag og var partur af langflestu sem að vel gekk í sóknarleik gestanna í dag. Hann þarf að halda áfram á sömu braut til að bjarga KR frá falli.
Atvikið
Það er hægt að nefna glæsimörk Arons Sigurðarsonar, en ég ætla að gefa Andra Fannari Stefánssyni þetta. Hann skoraði þarna sitt fyrsta deildarmark síðan 2019 og gerði KA mönnum kleift að anda léttar. Yfirvegaður og klínískur undir pressu - frábærlega gert hjá þessum reynslubolta.
Hvað þýða úrslitin?
KA skellir sér á toppinn í neðri hlutanum þar sem að ÍBV og Afturelding gerðu jafntefli í Vestmannaeyjum. Þeir hafa nælt í 32 stig og Eyjamenn hafa tveimur færri í 2. sætinu. KR eru í næst neðsta sæti og spila gríðarlega mikilvægan leik á Akranesi í næstu umferð. Þar mæta þeir ÍA, en Skagamenn hafa verið á mikilli siglingu að undanförnu og því ljóst að KR-ingar eiga ærið verkefni fyrir höndum.
Vondur dagur
KR-ingar áttu fínan fyrri hálfleik, voru ofan á í baráttunni og leiddu þá verðskuldað 1-2. En eins og loðir við lið í basli að þá átti KR fá svör eftir að KA menn komust yfir síðari hálfleik. Það virtist öll hugmyndaauðgi skella í lás og þeir náðu ekki að setja heimamenn í alltof mikið kerfi þegar þeir freistuðu þess að fá eitthvað útúr leiknum.
Dómarinn - 5
Spurning hvort að Amin Cosic hafi ekki átt að fá rautt spjald fyrir brot sitt þegar Birnir Snær slapp í gegn. Svo voru nokkrar skrítnar ekki eins veigamiklar ákvarðanir þess á milli. Átt betri leiki.