SKÝRSLAN: Þróttur byrjar á þremur stigum gegn sterkum Njarðvíkingum
Hvað réði úrslitum?
Fyrri hálfleikurinn var alveg rosalega rólegur og lítið að gerast, maður bjóst nú við aðeins meiri skemmtun miðað við hvað þetta eru sterk lið en seinni hálfleikurinn var mun betri. Þróttarar byrjuðu seinni betur þangað til að þeir skora fyrsta mark, en Njarðvíkingar stigu aðeins upp eftir það, svo eftir seinna markið dró svolítið úr þessu.
Bestu leikmenn
1. Sigurður Egill Lárusson
Það var mikið talað um fyrir tímabil að Sigurður Egill væri alltof góður í þessa deild og á köflum sást það klárlega. Hann var mikið að flakka á milli kanta en var reyndar með nokkra slæma bolta snemma í leiknum. En þegar það leið á leikinn varð hann hættulegri og hann gerði frábærlega í fyrra markinu , og uppskar þar stoðsendingu.
2. Tryggvi Snær Geirsson
Tryggvi kom nú frekar seint inn á en hann kom strax inn á með áhrif, hann var mikið á boltanum og var hættulegur og hann tók síðan aukaspyrnuna sem leiddi að seinna marki Þróttara.
Atvikið
Það var nú ekkert magnað atvik í dag, seinna mark Þróttara var nú samt mjög huggulegt mark úr föstu leikatriði, Tryggvi með mjög góðan bolta á fjær á Aron Snæ sem skallar hann á Hlyn sem leggst eiginlega á boltann til að koma honum inn.
Hvað þýða úrslitin?
Þessi úrslit þýða svo sem ekki mikið í fyrstu umferð, þetta eru tvö spennandi lið og þeim báðum spáð í toppbaráttunni, Þróttarar klárlega sáttir með að ná í þrjá punkta en þetta er enginn heimsendir fyrir Njarðvíkinga.
Vondur dagur
Mér fannst nú enginn hræðilegur í þessum leik, Jóhann Ægir var í smá brasi snemma leiks eins og hann væri stressaður, en datt síðan í meiri gír þegar leið á. Það er búið að vera mikið ritað og rætt um Leandro Fernandes fyrir tímabil en mér fannst hann hanga alltof mikið á boltanum í dag, hélt mikið í hann með bakið í varnarmann og var ekki mikið að horfa fram á við.
Dómarinn - 6
Mér fannst dómarinn fínn í dag, leyfði leiknum að ganga vel og lítið hægt að kvarta. Það kom reyndar upp atvik þegar Sigurjón Már lítur út fyrir að toga Vilhjálm Kaldal niður þegar hann er að sleppa einn á móti markmanni og vildu Þróttarar fá aukaspyrnu og pottþétt rautt í leiðinni, væri áhugavert að sjá þetta aftur.