SKÝRSLAN: Flugeldasýning viku fyrir Menningarnótt
Hvað réði úrslitum?
KA mætti til leiks af miklum krafti og gerði vel í að komast yfir. Það var sem gestirnir væru hræddir við forskotið og Valsmenn gengu á lagið í seinni háfleik. Valur sýndi mikinn karakter og skoraði meðal annars tvö mörk eftir löng innköst. Bæði lið spiluðu flottan fótbolta og jafntefli líklega sanngjörn niðurstaða þó heimamenn hafi verið líklegri undir restina.
Bestu leikmenn
1. Jakob Snær Árnason (KA)
Mikilvægi hans sást bersýnilega eftir að hann fór útaf eftir 52 mínútna leik. Jakob var virkilega kraftmikill og skoraði tvö góð mörk.
2. Hólmar Örn Eyjólfsson (Valur)
Það er í raun ómögulegt að velja menn leiksins. Ég sleppi bæði Hallgrími Mar og Patrick Pedersen sem skoruðu báðir tvennu og hefðu alveg eins getað verið þarna. Hólmar fær náttúrulega á sig fjögur mörk en hann skorar og leggur upp til þess að bæta upp fyrir það. Spurning hvort hann hafi lagt upp annað, ég sá hreinlega ekki hvort boltinn hafi farið af honum.
Atvikið
Patrick Pedersen jafnar metin í 3-3 á 67. mínútu og það ætlaði allt um koll að keyra á Hlíðarenda. Tilfinningin var sú að nú myndu heimamenn taka þetta.
Hvað þýða úrslitin?
Valur er enn í 7. sæti deildarinnar, tveimur stigum frá Keflavík og ÍA í fimtta og sjötta sæti. KA er enn í fallsæti, nú er stig í FH og ÍBV í níunda og tíunda sæti.
Vondur dagur
Frederik Schram gerir sig sekan um slam mistök í öðru marki KA. Hann gefur boltann frá sér og mistekst svo að verja langskot Hallgríms Mar. KA-liðið var of lítið í sér í seinni háfleik og féll alltof mikið til baka.
Dómarinn - 6
Þetta var ekki svo erfiður leikur að dæma og Helgi Mikael var fínn. Var ósammála sumu eins og gengur og gerist.