SKÝRSLAN: Grunngildin í lagi í Breiðholtinu
Hvað réði úrslitum?
ÍR unnu þetta á vilja og baráttu, svo einfalt var það og þegar grunngildin eru í lagi að þá fylgir hitt oft. Davíð Smári sagði í viðtali eftir leikinn að ÍR hefði viljað þetta meira en Njarðvík en hann kjarnaði þetta fullkomlega þar.
Bestu leikmenn
1. Bergvin Fannar Helgason (ÍR)
Bergvin Fannar var gríðarlega öflugur fyrir ÍR-inga í dag. Ótrúlega öflugur í loftinu og vann hvert skallaeinvígið á fætur öðru. Alveg óttalaus í sínum aðgerðum hvort sem það var þegar hann keyrði á varnarmenn, eins og í fyrsta markinu, eða þegar hann var í baráttunni við Eið Aron í loftinu. Góð frammistaða hjá honum í dag og vel að þessum titli kominn.
2. Óliver Andri Einarsson (ÍR)
Margir ÍR-ingar sem hefðu getað verið í þessum dálk en Óliver fær þetta í dag. Óliver er lúsiðinn og alltaf líklegur til þess að búa eitthvað til, leggur upp tvö og var heilt yfir frábær í dag.
Atvikið
Þriðja mark ÍR endanlega drap þennan leik að mínu mati. Það er alltaf hættulegt að vera með eins marks forystu þrátt fyrir að vera betra liðið og var þriðja mark ÍR gríðarlega mikilvægt. Eftir markið voru Njarðvík aldrei líklegir í rauninni og ÍR gerðu vel í að sigla þessu heim.
Hvað þýða úrslitin?
ÍR sækja þrjú, lífsnauðsynleg, stig og koma sér upp fyrir Grindavík og koma í veg fyrir að Völsungur, sem unnu líka í dag, fari upp fyrir þá. Njarðvík eru líklega að stimpla sig út úr baráttunni um að ná toppsætinu og í raun bara spurning um að reyna að enda eins ofarlega og hægt er fyrir sem bestan möguleika í umspilinu.
Vondur dagur
Það sem hefur einkennt Njarðvík, og önnur lið Davíðs Smára, er góður varnarleikur og mikil barátta. Það var ekki að sjá í dag. Seinni tvö mörk ÍR voru skoruð af mönnum sem voru einir og óvaldaðir í teignum sem Davíð Smári var eðlilega ósáttur með. Mjög ólíkt mönnum en varnarlínan öll var á hælunum í dag.
Dómarinn - 6
Mér fannst Gunnar Oddur ágætur í dag. Virtist á köflum vera að missa þetta upp í einhverja vitleysu en svo varð þó aldrei. Mjög einkennilegt að Njarðvík fengu ítrekað að taka hornin á vitlausum stað sem ég hef ekki séð áður. Boltanum var alltaf stillt upp langt frá línunni og þegar ÍR-ingar reyndu að benda teyminu á það þá ypptu þeir bara öxlum. Ekki það stærsta úr þessum leik en mjög einkennilegt þó.