Liðin eru að berjast um annað sæti deildarinnar eftir að Juventus tryggði sér Ítalíumeistaratitilinn.

Inter er í öðru sæti sem stendur, einu stigi fyrir ofan Atalanta og Lazio. Lazio heimsækir Napoli á sama tíma.

„Ég vona að þetta verði frábær leikur. Við munum spila sóknarbolta án þess að vera að reikna of mikið út. Þetta verður erfiður leikur gegn sterku liði sem hefur fest sig í sessi meðal fjögurra bestu liða deildarinnar," sagði Conte á Inter TV.

„Atalanta er með bestu sókn deildarinnar en við erum með næstbestu sóknina, auk þess að vera með bestu vörnina. Við viljum enda tímabilið á frábærum leik."

Atalanta er með bestu markatöluna í deildinni; 98 mörk skoruð og 46 fengin á sig. Inter er með næstbestu markatöluna, 79 skoruð og 36 fengin á sig. Markatalan hjá toppliði Juventus er 75-40.