Ítalía: Juventus á toppinn eftir dramatískan sigur

Juventus er komið á toppinn í Serie A í bili að minnsta kosti eftir dramatískan sigur á Monza í kvöld.

Juventus fékk vítaspyrnu snemma leiks en Michele Di Gregorio varði spyrnuna frá Dusan Vlahovic. Juventus fékk hornspyrnu í kjölfarið og Adrien Rabiot átti þá kröftugan skalla og boltinn hafnaði í netinu.

Það var síðan dramatík undir lokin en Valentin Carboni jafnaði metin fyrir Monza en hann ætlaði að senda boltann inn á teiginn en boltinn hafði ekki viðkomu í neinum á leiðinni í netið.

Leiknum var hins vegar ekki lokið og á fjórðu mínútu í uppbótatíma skoraði Federico Gatti sigurmarkið fyrir Juventus. Rabiot átti frábæran sprett inn á teig Monza og náði fyrirgjöf en Gatti hitti ekki boltann í fyrstu tilraun en fékk aðra tilraun og þá negldi hann boltanum í netið.

Juventus er á toppi deildarinnar með eins stigs forystu á Inter sem heimsækir Napoli í sunnudaginn. Monza er í 10. sæti með 18 stig.