Aron þreyttur: Kærkomið að komast inn á völlinn aftur

„Hörku leikur og drullu erfitt að spila hérna við Keflavík sem að eru bara flott lið og ég er bara gríðarlega ánægður með stigin" sagði Aron Elís Þrándarson eftir sigurinn í kvöld. 

„Við vorum tilbúnir í þessa baráttu um seinni bolta og þetta sem þarf til. Grasið er bara erfitt en samt alveg hægt að spila á því og mér fannst við svona ná nokkrum augnablikum í leiknum þar sem við spiluðum vel" 

„Keflavík er bara hörku fínt lið og þeir munu fá fullt af stigum hérna í sumar" 

Keflavík náði á köflum að þrýsta liði Víkinga svolítið aftarlega og þá skipti máli að halda haus. 

„Það er bara þannig í fótboltaleikjum að stundum þarftu bara að leggjast niður, sama á móti hverjum. Keflavík er bara gott lið og þeir setja mikið af boltum í teiginn þegar þeir geta og þá er það bara að verjast og skalla þetta í burtu" 

Aron Elís Þrándarson hefur glímt við meiðsli undanfarið ár en hann sleit krossband í upphafi móts síðasta sumar. 

„Ég er þreyttur núna. Þetta er búið að vera gríðarlega erfið meiðsli og ég er búin að vera díla við smá bakslög á undirbúningstímabilinu og líður ágætlega núna þannig það er bara kærkomið að komast inn á völlinn aftur" sagði Aron Elís Þrándarson.