England: Tottenham komst upp úr fallsæti

Tottenham er komið upp úr fallsæti eftir annan sigurinn í röð í úrvalsdeildinni. Þetta er í fyrsta sinn sem liðið vinnur tvo deildarleiki í röð síðan liðið vann fyrstu tvo leikina á tímabilinu.

Conor Gallagher kom Tottenham yfir þegar hann skoraði með góðu skoti fyrir utan teiginn. Þetta var fyrsta mark hans fyrir liðið síðan hann kom í janúar frá Atletico Madrid.

Richarlison sá til þess að Tottenham var með tveggja marka forystu í hálfleik þegar hann skoraði með skalla eftir fyrirgjöf frá Mathys Tel.

Seinni hálfleikur var nokkuð tíðindalítill en Emi Buendia klóraði í bakkann fyrir Aston Villa í blálokin þegar hann skallaði boltann í netið eftir fyrirgjöf frá Matty Cash.

Eins og fyrr segir er Tottenham komið upp úr fallsæti. Liðið situr í 17. sæti með 37 stig, stigi á undan West Ham. Aston Villa er í 5. sæti með 58 stig. Liðið fær Nottingham Forest í heimsókn í vikunni í seinni leik liðanna í undanúrslitum Evrópudeildarinnar en Villa er 1-0 undir í einvíginu.