Ætlar ekki að versla í janúar þrátt fyrir veikleika í vörninni

„Ég er mjög hrifinn af Fernandinho í þessari stöðu. Ég vil helst að hann spili þar, þess vegna gerir hann það," segir Guardiola.

Varnarleikurinn hefur verið gagnrýndur hjá City sem augljós veikleiki en félagið fékk ekki leikmann í staðinn fyrir Vincent Kompany í sumar. Þá meiddist Aymeric Laporte og Guardiola hefur ákveðið að spila Nicolas Otamendi og John Stones ekki saman síðan í september.

Það mun þó ekki ýta Guardiola út á leikmannamarkaðinn, hann ætlar að halda áfram nota Fernandinho sem miðvörð.

„Ég hef ekki áhuga á að fá neinn í janúar," segir Guardiola en hann brást illa við því á fréttamannafundi þegar hann var spurður út í hvaða gæði Fernandinho hefði varnalega.

„Hefur þú horft á leikina?" svaraði Guardiola.

Samningur Fernandinho, sem er 34 ára, rennur út næsta sumar en búist er við því að hann fái nýjan samning.