Ítalía: Zapata með tvennu í sigri gegn gömlu liðsfélögunum

Torino og Atalanta áttust við í eina leik kvöldsins í efstu deild ítalska boltans og voru það heimamenn sem tóku forystuna í fyrri hálfleik.

Duván Zapata skoraði þar gegn sínum fyrrum liðsfélögum eftir lága sendingu inn í teiginn frá Nikola Vlasic, en miðvörðurinn ungi Giorgio Scalvini gerði slæm mistök og hleypti sendingunni framhjá sér til að gera Zapata kleift að skora.

Atalanta tókst ekki að skapa sér mikla hættu og var leikurinn þokkalega bragðdaufur, en það voru heimamenn sem tvöfölduðu forystuna í síðari hálfleik. Antonio Sanabria skoraði þá úr vítaspyrnu eftir klaufalegt brot hjá Scalvini innan vítateigs er Torino undirbjó hornspyrnu.

Atalanta tókst ekki að ógna mikið eftir þetta og gerði Zapata þriðja mark heimamanna seint í uppbótartíma. Niðurstaðan sanngjarn 3-0 sigur Torino, sem er um miðja deild með 19 stig eftir 14 umferðir.

Atalanta er með 20 stig og hefði komist í Evrópusæti með sigri í kvöld.