Leikurinn byrjaði mjög fjörlega og voru það heimamenn sem byrjuðu betur. Patrick Bamford og Pascal Struijk komust báðir í góð færi snemma leiks en tókst ekki að skora.

Það var á þrettándu mínútu sem hinn sjóðheiti Stuart Dallas kom Leeds yfir með marki af stuttu færi. Adam var þó ekki lengi í paradís og var það Son Heung-Min sem jafnaði leikinn á 25. mínútu eftir stoðsendingu frá Dele Alli.

Harry Kane hélt að hann væri að koma Tottenham yfir þegar hann fékk sendingu inn fyrir vörn Leeds og kláraði færið snyrtilega. VAR skoðaði hins vegar atvikið, teiknaði fullt af línum eins og svo oft áður og að lokum varð niðurstaðan rangstæða. Mjög tæpur dómur.

Það var síðan markaskorarinn Patrick Bamford sem kom Leeds yfir undir lok fyrri hálfleiks eftir flotta sókn. Hann fékk sendingu frá Ezgjan Alioski og kláraði færið vel.

Síðari hálfleikurinn var fjörugu og fengu bæði lið góð færi til þess að skora. Leeds var þó betra liðið og var það Rodrigo sem tryggði liðinu sanngjarnan sigur með marki undir lok leiks.

Slæmt tap hjá Tottenham í baráttunni um Evrópusæti á meðan Leeds fer upp fyrir Arsenal og í níunda sætið.