Myndi segja upp ef ég teldi mig ekki rétta manninn

„Ef ég væri í vafa þá myndi ég ekki sitja hérna. Félagið er í mínum huga það mikilvægasta, ég set það í forgang yfir mig sjálfan. Ef ég teldi mig ekki vera rétta manninn til að leiða liðið áfram og ég gæti ekki fært leikmönnum það sem þeir þurfa þá myndi ég stíga til hliðar," segir Eddie Howe, stjóri Newcastle.

Newcastle, sem hefur aðeins unnið einn af síðustu átta leikjum, mætir Tottenham á morgun.

Howe nýtur stuðnings stjórnar Newcastle eftir að hafa stýrt liðinu til langþráðs titils í fyrra er það vann Liverpool í úrslitaleik deildabikarsins.

Newcastle getur komist í 16-liða úrslit Meistaradeildarinnar með því að vinna Qarabag frá Aserbaísjan og þá er liðið enn í FA-bikarnum þar sem mótherjinn verður Aston Villa um næstu helgi.