HK jafnaði í gær með marki undir lokin beint úr aukaspyrnu af löngu færi og spurning hvort Ólafur hefði getað gert betur í markinu. Markvarðarstaða Fylkis var til umræðu í Pepsi Max-stúkunni eftir leikina í gærkvöldi.

„Ég sagði það hérna í þessum þætti um daginn. Versta ákvörðun þjálfara er þegar hann fer að hræra með markmennina sína. Það er bara einn markmaður og svo er varamarkmaður," sagði Ólafur Jóhannesson, sérfræðingur í þættinum.

„Það er alveg ljóst að þetta er aðalmarkmaður Fylkis. Ólafur er aðalmarkmaður, það er búið að ákveða það. Annars væri hann ekki markinu. Það hlýtur að vera þannig. Þú þarft að gefa mönnum traust, þó þeir eigi kannski ein mistök þá er ekki þar með sagt að þú eigir að henda honum. Þú verður að sýna ákveðið traust og ég skora á Atla að gera það fyrst hann stóð við það að láta hann vera aðalmarkmann," sagði Óli.

Í textalýsingu sinni skrifaði Stefán Marteinn Ólafsson eftirfarandi á 91. mínútu:

„MAARRK!!! HK JAFNA!!! Skorar beint úr aukaspyrnu langt utan af velli! LITLA MARKIÐ!!!" Skotið var eins og fyrr segir af löngu færi og tiltölulega beint á markið.

Hefðiru viljað sjá markmanninn gera betur?

„Já, ég held að ég og Óli séum báðir sammála um að hann eigi að verja þetta skot, ekki spurning," sagði Atli Sveinn Þórarinsson, annar af þjálfurum Fylkis, í viðtali við Stöð 2 Sport í gærkvöldi.