Tvær breytingar til viðbótar á landsliðshópnum - Mikael Anderson ekki með

Tvær breytingar til viðbótar hafa verið gerðar á leikmannahópi Íslands fyrir komandi leiki í Þjóðadeildinni, gegn Svartfjallalandi og Wales.

Rúnar Þór Sigurgeirsson og Andri Fannar Baldursson koma inn í hópinn í staðinn fyrir Mikael Anderson, leikmann AGF, og Hlyn Frey Karlsson, Brommapojkarna.

Ekki er gefin útskýring á því af hverju Mikael og Hlynur verða ekki með en líklega er um meiðsli að ræða. Hlynur hafði verið kallaður upp í landsliðið á laugardaginn en það var stutt stopp hjá honum í hópnum.

Rúnar Þór Sigurgeirsson er 24 ára bakvörður sem spilar fyrir Willem II í hollensku úrvalsdeildinni. Hann á tvo landsleiki, báða vináttulandsleiki. Andri Fannar Baldursson er 22 ára miðjumaður og á tíu landsleiki.

Ísland mætir Svartfjallalandi og Wales á útivöllum í síðustu leikjum okkar liðs í riðli Þjóðadeildarinnar. Leikið verður gegn Svartfellingum næsta laugardag.

Svartfellingar eru á botni riðilsins en við Íslendingar erum í þriðja sæti, sem er umspilssæti um að halda sæti sínu í B-deildinni. Ef við vinnum Svartfjallaland gæti opnast möguleiki á að ná öðru sæti riðilsins.