Arnar tók sér tveggja mínútna hlé sem landsliðsþjálfari til að gagnrýna England

Thomas Tuchel hefur fengið mikið hrós fyrir góðar skiptingar á mótinu. Það klikkaði hins vegar í kvöld. Hann tók markaskorarann Anthony Gordon af velli fyrir Ezri Konsa á 72. mínútu. Tíu mínútum síðar gerði hann tvær varnarskiptingar í viðbót og Argentína skoraði tvö mörk í kjölfarið og tryggði sér sigur.

„Mér fannst frammistaða Englands til skammar eftir að þeir skora. Lið númer fjögur á heimslistanum að bakka í lágvörn og vera þar eins og gínur. Það er eitt að vera í lágvörn og annað að vera í lágvörn með ákefð. Argentínumenn gengu á lagið og það var orrahríð að marki Englands. Ég er stuðningsmaður Englands en ég fagnaði þegar Argentína skoraði."

„Ég er svo mikill stuðningsmaður fótboltans. Maður vill ekki sjá svona frammistöðu hjá toppþjóðum. Þeir svíkja sjálfan sig hálfpartinn. Liðið sem var eftir þegar Argentína gerði annað markið var aldrei líklegt. Þeir sviku allt sem þeir stóðu fyrir fyrir mót."

Argentína mætir Spáni í úrslitum á sunnudaginn og getur varið heimsmeistaratitilinn. England mætir Frakklandi í leiknum um þriðja sætið á laugardaginn.

„Ég er glaður fyrir hönd Argentínu. Bæði lið sem eru komin í úrslitaleikinn eiga eitt sameiginlegt að boltinn er vinur þeirra hjá öllum leikmönnum. Þeir passa upp á að hann fái að njóta sín."