Newcastle United er svo gott sem búið að tryggja sér sæti í 16-liða úrslitum Meistaradeildarinnar eftir frábæran fyrri hálfleik á útivelli gegn Qarabag. Liðin eru að etja kappi þessa stundina.
Það var aðeins eitt lið á vellinum fyrir leikhlé þar sem Qarabag skapaði sér ekki stakt færi á meðan gestirnir frá Newcastle óðu í færum.
Góð færi fóru forgörðum en það skipti engu máli því gestunum tókst að skora fimm mörk, með Anthony Gordon fremstan í flokki.
Gordon gerði sér lítið fyrir og skoraði fernu í fyrri hálfleik, sem hefur aldrei verið gert áður í útsláttarkeppni Meistaradeildarinnar.
Nokkrir leikmenn hafa skorað fjögur mörk í sama leiknum í útsláttarkeppninni, en engum hefur tekist að skora þau öll í sama hálfleiknum.
Cristiano Ronaldo og Robert Lewandowski hafa afrekað að skora fjögur mörk í sama hálfleik í Meistaradeildinni, en það var í riðlakeppninni.
Athugasemdir
