Álasund stefnir upp - Íslendingalið berjast um annað sætið
Það fór fram heil umferð í norsku B-deildinni í dag. Álasund færist nær því að tryggja sæti sitt í efstu deild.
Álasund fékk KFUM í heimsókn og náði að knýja fram 2-1 sigur. Hólmbert Aron Friðjónsson átti stoðsendinguna að fyrra marki Álasund. Það gerði Torbjørn Agdestein og jafnaði hann eftir að KFUM hafði komist yfir úr vítaspyrnu stuttu áður.
Í seinni hálfleik komst Álasund yfir með marki úr vítaspyrnu. Nokkrum sekúndum eftir vítaspyrnumarkið fékk Daníel Leó Grétarsson, sem kom inn í síðasta A-landsliðshóp, að líta sitt annað gula spjald.
56' Rødt kort til Daniel Leo Gretarsson. Islendingen får sitt andre gule for kvelden og må forlate banen.#aafk #sunnmøresstolthet
— AaFK - Aalesunds FK (@AalesundsFK) September 18, 2019
🔶AaFK 2 - 1 KFUM🔷
Álasund var einum færri frá 56. mínútu, en náði þrátt fyrir það að landa sigrinum. Lokatölur 2-1.
Daníel Leó, Davíð Kristján Ólafsson, Hólmbert Aron og Aron Elís Þrándarson voru allir í byrjunarliðinu hjá Álasundi í dag. Allir spiluðu allan leikinn, fyrir utan auðvitað Daníel Leó.
Álasund er á toppnum í norsku B-deildinni með 11 stiga forystu þegar sjö umferðir eru eftir.
Tvö efstu liðin fara beint upp, en liðin í þriðja til sjötta sæti fara í umspil um síðasta lausa sætið. Í öðru og þriðja sæti eru einnig Íslendingalið.
Í öðru sæti er Start, sem vann 2-0 gegn Nest-Sodra í dag. Aron Sigurðarson skoraði annað mark Start í leiknum, en hann er kominn með 12 mörk í 23 deildarleikjum á tímabilinu. Jóhannes Þór Harðarson er þjálfari Start.
Start er með 49 stig, eins og Sandefjord, sem vann 2-0 gegn Strømmen. Viðar Ari Jónsson spilaði allan leikinn fyrir Sandefjord, Emil Pálsson var allan tímann á bekknum en hann er að stíga upp úr erfiðum meiðslum.
Start og Sandefjord eru með tíu stiga forystu á næstu lið og er baráttan því þeirra um annað sætið.
Athugasemdir