Jóhann: Það var meira undir hjá þeim

Hversu ánægður ertu með frammistöðuna og sigurinn í dag?

„Við erum auðvitað mjög ánægð og stolt með þetta. Sterkur sigur í þessum erfiða útileik, við þessar aðstæður og gegn þessu góða liði. Ég er mjög ánægður með liðið og frammistöðuna hjá okkur.“

Hvernig myndir þú gera upp leikinn?

„Bara hörkubarátta. Það var mikið undir hjá öðru liðinu og mér fannst það alveg sjást á FH-liðinu í dag. Við vorum kannski aðeins afslappaðri en þurftum samt að berjast, því þetta er alls ekkert auðvelt lið að eiga við. Þær hætta aldrei og berjast í 90 mínútur. Ég get ekki annað en verið ánægður með mitt lið og mína leikmenn í dag. Þær stóðu sig frábærlega.“

Hver fannst þér vera aðalmunurinn á liðunum í dag?

„Ég veit ekki hvort það sé hægt að tala um einhvern sérstakan mun. Við spilum ekki eins og þær og þær spila ekki eins og við. Við breyttum aðeins í hálfleik og þurftum að gera það. Þær voru búnar að reyna mikið á sexuna okkar og báða bakverðina.

Munurinn fannst mér fyrst og fremst liggja í trú, sannfæringu og samvinnu hjá mínu liði. Mér fannst FH kannski fara aðeins á taugum á einhverjum tímapunkti. Það var svo mikið undir hjá þeim og eitthvað sem var ekki að ganga.“

FH skapaði sér fínar stöður í fyrri hálfleik en virtist ekki jafn hættulegt í þeim seinni. Ertu sammála því?

„Já, ég er sammála því. Í fyrri hálfleiknum gerðu þær mikið hjá okkur en náðu ekki að nýta sér það. Við leiddum 2-0 í hálfleik og það má ekki gleyma því. Þær töpuðu seinni hálfleiknum líka 2-0.

Mér finnst þetta sanngjarnt. Kannski lá munurinn í því að það var meira undir hjá þeim og það er erfiðara að eiga við það á þessum tímapunkti. Allir eru orðnir þreyttir eftir langt og erfitt tímabil. Mitt lið var allavega til fyrirmyndar og átti þennan frábæra sigur fyllilega skilið.“

Þið voruð 2-0 yfir í hálfleik. Hvernig lögðuð þið upp seinni hálfleikinn til að klára leikinn?

„Við þekkjum það ágætlega að vera í þessari stöðu. Fyrir tveimur vikum vorum við í 2-0 stöðu á útivelli gegn hinu toppliðinu. Við byrjuðum seinni hálfleikinn illa, komumst aðeins yfir aftur en svo tóku þær yfir og réðust á okkur af fullum krafti.

Við náðum að halda aftur af FH í þetta skiptið. Þær náðu einfaldlega ekki að finna þessa lykt og þar af leiðandi fannst mér við stýra leiknum mjög örugglega í seinni hálfleik.“