Samþykkt var á ársþingi KSÍ í Ólafsvík í dag að nýr starfshópur skipaður til þess að fara ítarlega yfir mögulega fjölgun félaga í Pepsi Max-deild karla. Ber starfshópnum að skila áliti sínu og tillögum eigi síðar en 1. september 2020.
ÍA lagði fram þá tillögu að fjölga liðum í efstu deild karla svo þau verði fjórtán á næsta ári. Í dag eru tólf lið í deildinni.
Á vef Morgunblaðsins segir að þar með sé ljóst að liðum eða leikjum í deildinni verði í fyrsta lagi fjölgað frá og með tímabilinu 2022.
„Þetta fyrirkomulag er fyrst og fremst hugsað til þess að fleiri ungir íslenskir leikmenn fái tækifæri til að spila í meistaraflokki og fái þannig meiri spiltíma. Myndi það efla íslenska knattspyrnu til framtíðar. Samhliða myndu þannig fleiri leikmenn fá betri leiki. Félög á landinu, í 1.-4. deild, fá aukið svigrúm til endurskipulagningar á sínum rekstri í ljósi þess að færri lið falla milli deilda en áður. Í ljósi erfiðs rekstrarumhverfis, og fyrirsjáanlegu framhaldi á því, er mikilvægt að félögin fái tækifæri til að skoða rekstur sinn og stefnur. Samhliða því munu fleiri félög eiga möguleika á því að klífa upp milli deilda og komast þannig í auknar tekjur. Slíkt myndi leiða af sér betri og faglegri umgjörð sem er félögum til mikilla hagsbóta," sagði í tilkynningu frá ÍA í janúar.
Nánar má lesa um fleiri tillögur á ársþingi KSÍ og afgreiðslu þeirra á vef KSÍ.
Athugasemdir