Afturelding og Leiknir R. áttust við í Lengjubikar karla í dag og úr varð afar fjörug viðureign þar sem liðin skiptust á að taka forystuna áður en leikurinn endaði með jafntefli.

Andi Hoti skoraði fyrsta mark leiksins til að koma Leikni yfir á 23. mínútu, en Elmar Kári Cogic svaraði fyrir Mosfellinga með því að skora tvennu.

Afturelding virtist ætla inn í hálfleikinn með 2-1 forystu, en Omar Sowe var á öðru máli og jafnaði metin fyrir leikhlé.

Andi Hoti var aftur á ferðinni í upphafi síðari hálfleiks og kom hann Breiðhyltingum yfir í annað sinn í leiknum en sú forysta lifði ekki lengi, þar sem Elmar Kári var mættur á svæðið til að fullkomna þrennuna sína og jafna leikinn fyrir Aftureldingu.

Staðan var því orðin 3-3 á 60. mínútu en hvorugu liði tókst að bæta marki við þessa fjörugu viðureign.

Leiknismenn eru í öðru sæti eftir þetta jafntefli, með fimm stig eftir þrjár umferðir, á meðan Afturelding er með fjögur stig eftir fjórar umferðir.