Ekki sömu reglur um hendi í Meistaradeildinni og á Englandi

Sú regla sem er á hvað gráasta svæðinu í fótboltanum er hvenær eigi að dæma hendi og hvenær ekki. Til að flækja hlutina enn frekar fyrir leikmönnum, þjálfurum og áhugafólki þá geta reglurnar verið mismunandi eftir því um hvaða keppni er að ræða.

Newcastle var að takast að landa mikilvægum sigri gegn Paris St-Germain í Meistaradeildinni í gær þegar franska liðið fékk vítaspyrnu. Szymon Marciniak, einn besti dómari heims, var sendur í VAR skjáinn og dæmdi hendi á Tino Livramento.

Áður en boltinn fór upp í hendina á honum hafði hann viðkomu í líkama hans. Í ensku úrvalsdeildinni er viðmiðið það að ekki eigi að dæma hendi ef boltinn hefur viðkomu í líkama hans á undan. Samkvæmt reglum ensku deildarinnar hefði því ekki átt að dæma víti.

En hinsvegar er þessi regla ekki í gildi í Meistaradeildinni.