Man Utd spilar á rennandi blautum velli í Tyrklandi

Klukkan 17:45 hefst leikur Galatasaray og Manchester United í Tyrklandi. Það hefur rignt hressilega í Istanbúl í dag og umræða verið í gangi um mögulega frestun.

Stephen Warnock er á vellinum fyrir breska ríkisútvarpið og segir hann að veðrið sé virkilega slæmt og vegir verið á floti þegar hann fór á völlinn.

Vangaveltur hafa verið í gangi um að færa leikinn mögulega á morgundaginn en UEFA hefur sagt að hann muni fara fram á tilsettum tíma.

U19 lið þessara félaga mættust fyrr í dag í borginni í Evrópukeppni unglingaliða og þar var völlurinn nánast eins og sundlaug og hellirigning eins og sjá má á meðfylgjandi mynd.