Fyrrum KA-mennirnir með frábæra samvinnu fyrir Víking

Íslandsmeistarar Víkings eru komnir í seilingarfjarlægð við annan Íslandsmeistaratitil en þeir unnu öruggan 4-1 sigur gegn Keflavík á Víkingsvelli í gær.

Daníel Hafsteinsson, sem átti frábært kvöld skoraði fyrsta mark leiksins eftir frábæra hælsendingu frá Sveini Margeiri Haukssyni. Þeir tveir þekkja hvorn annan út og inn og léku einnig saman hjá KA.

Magnús Atlason, fréttamaður Fótbolta.net, valdi markið sem atvik leiksins.

„Mark Daníels Hafsteinssonar á 21. mínútu. Frábært spil hjá fyrrum liðsfélögum hjá KA sem endaði með flottri afgreiðslu. Flóðgáttir opnuðust í kjölfarið og þrjú mörk voru skoruð á 10 mínútum," skrifaði Magnús.

Markið má sjá hér að neðan og einnig má sjá flott mark Róberts Orra Þorkelssonar úr leiknum; sláin, sláin, inn!