Spánn: Nicolas Pepe skoraði sitt fyrsta mark í sigri Villarreal

Nýliðar Las Palmas leita enn eftir fyrsta sigrinum í spænsku deildinni en liðið byrjaði sterkt á útivelli gegn Villarreal í kvöld. Fabio Silva og Ollie McBurnie fengu góð tækifæri til að koma liðinu á blað en tókst ekki að sigra Diego Conde í marki Villarreal.

Villarreal sótti í sig veðrið eftir því sem leið á fyrri hálfleikinn og braut ísinn á loka mínútunni þegar Nicolas Pepe kom boltanum í netið og skoraði sitt fyrsta mark fyrir félagið.

Silva jafnaði metin strax í upphafi síðari hálfleik eftir undirbúning Adnan Januzaj. Stuttu síðar fékk Villarreal vítaspyrnu en Dinko Horkas varði spyrnuna frá Alex Baena.

Thierno Barry kom Villarreal yfir undir lok leiksins eftir undirbúning Baena og sá síðarnefndi innsiglaði sigurinn með marki í uppbótatíma.