Byrjunarliðin - Þórður Ingason í markinu
Byrjunarliðin eru komin inn.

Þórður Ingason heldur áfram traustinu í Mjólkurbikarnum og stendur í markinu hjá Víkingum í dag. Ingvar Jónsson fær sér sæti á bekkinn. Víkingar stilla upp gríðarlega sterku byrjunarliði.

Akureyringarnir í KA stilla sömuleiðis upp sterku byrjunarliði þar sem Ívar Örn Árnason mun leiða liðið út með fyrirliðabandið.

Víkingur mun sigurstranglegri

Björn Bjartmarz heiðursgestur Víkinga á bikarúrslitaleiknum Björn er einn af dáðustu sonum félagsins. Hann hefur sem leikmaður, þjálfari, framkvæmdastjóri og gegnheill Víkingur haft mikil áhrif á framgang félagsins sl. 40 ár.

Björn æfði með félaginu upp alla yngri flokka og spilaði fjöldi leikja með meistaraflokki og náði ferill hans hámarki þegar hann skoraði, eins og frægt er, tvö mörk í sigri Víkings á Víði í Garði sem tryggði liðinu Íslandsmeistaratitilinn árið 1991.

Björn gegndi stöðu framkvæmdastjóra félagsins frá árinu 1991-1996 þegar mikið gekk á og félagið var að flytja frá Hæðargarði í Víkina.

Björn hefur verið þjálfari hjá Víkingi í 36 ár eða frá 1987 og landað ófáum titlum sem slíkur. Nú hefur Björn ákveðið að láta staðar numið í þjálfun og því finnst félaginu viðeigandi að þakkað Birni fyrir sinn frábæra feril hjá félaginu með því að tilnefna hann sem heiðursgest á þessum bikarúrslitaleik.

Takk Bjössi

Heiðursgestur okkar Víkinga á morgun er enginn annar en... pic.twitter.com/lA53DOQvCN

— Víkingur (@vikingurfc) September 15, 2023

Evrópa í boði! Það er meira en bara Bikarmeistaratitill í húfi fyrir Akureyringa í dag en þeir eiga séns á að tryggja sig inn í Evrópukeppni næsta sumar með sigri og byggja þannig á flottan árangur sem þeir náðu í sumar þegar þeir fóru alla leið í 3.umferð Sambandsdeildar Evrópu en féllu úr leik gegn gríðarlega sterku liðu Club Brugge frá Belgíu.
KA náðu ekki að enda í efri hluta töflunnar fyrir skiptingu svo þeir fá ekki tækifæri á að vinna sér inn Evrópusætið í gegnum deild en fá hér frábært tækifæri til þess að tryggja sér sætið eftirsóknarverða í gegnum Mjólkurbikarinn og um leið skilja 4.sæti deildarinnar eftir án Evrópusætis.

Fari svo að Víkingar verji Bikarmeistaratitilinn sinn mun Evrópusætið færast niður á liðið sem endar í 4.sæti deildarinnar þar sem baráttan er hörð.

Leið Víkinga í úrslitin Víkingar mættu sömuleiðis til leiks í 32-liða úrslit keppninnar.

32-liða úrslit

Víkingur R. 6-2 Magni
1-0 Arnór Borg Guðjohnsen
2-0 Guðmundur Óli Steingrímsson (Sjálfsmark)
2-1 Páll Veigar Ingvarsson
3-1 Danijel Dejan Djuric
3-2 Viktor Már Heiðarsson
4-2 Helgi Guðjónsson
5-2 Sveinn Gísli Þorkelsson
6-2 Arnór Borg Guðjohnsen

16-liða úrslit

Víkingur R. 2-1 Grótta
1-0 Helgi Guðjónsson
1-1 Sveinn Gísli Þorkelsson (Sjálfsmark)
2-1 Logi Tómasson

8-liða úrslit

Þór Ak 1-2 Víkingur R.
0-1 Helgi Guðjónsson
1-1 Ingimar Arnar Kristjánsson
1-2 Ari Sigurpálsson

Undanúrslit

Víkingur R. 4-1 KR
1-0 Aron Elís Þrándarson
2-0 Erlingur Agnarsson
2-1 Benoný Breki Andrésson
3-1 Ari Sigurpálsson
4-1 Ari Sigurpálsson

Leið KA í úrslitin KA mættu til leiks í 32-liða úrslitum keppninnar eins og öll lið efstu deildar.

32-liða úrslit

KA 5-0 Uppsveitir
1-0 - Pætur Petersen
2-0 - Dusan Brkovic
3-0 Pætur Petersen
4-0 Dusan Brkovic
5-0 Sveinn Margeir Hauksson

16-liða úrslit

HK 1-3 KA
0-1 Ívar Örn Árnason
0-2 Hallgrímur Mar Steingrímsson
0-3 Bjarni Aðalsteinsson
1-3 Örvar Eggertsson

8-liða úrslit

KA 2-1 Grindavík
1-0 Birgir Baldvinsson
1-1 Marko Vardic
2-1 Jakob Snær Árnason

Undanúrslit

KA 2-2 Breiðablik (3-3 framlenging og KA vinur vító)
1-0 Ásgeir Sigurgeirsson
1-1 Klæmint Olsen
1-2 Höskuldur Gunnlaugsson
2-2 Ívar Örn Árnason
--Framlenging
2-3 Höskuldur Gunnlaugsson
3-3 Pætur Petersen
--KA sigrar í vító

Leikplanið klárt fyrir laugardaginn - ,,Við vitum hvar við getum meitt þá" „Þetta leggst mjög vel í mig, við erum orðnir spenntir fyrir þessum degi," segir Hallgrímur Jónasson, þjálfari KA, í samtali við Fótbolta.net.

Á laugardaginn leikur KA til úrslita í Mjólkurbikarnum gegn Víkingum á Laugardalsvelli.

„Við erum að æfa fyrir norðan, tökum æfingu á morgun, fljúgum svo suður og gistum hér. Við erum að æfa fyrir norðan en við höfum ákveðið að æfa á grasi fyrir þennan leik til að vera sem best undirbúnir."

KA fór síðast í úrslitaleik bikarkeppninnar árið 2004 þegar liðið tapaði á móti Keflavík.

„Þetta er mjög stór leikur, en við erum líka búnir að upplifa frábæra leiki í Evrópukeppninni. Við höfum verið að skrifa söguna í KA. Við vorum gríðarlega ánægðir með þá keppni. Við ætlum að gera allt sem við getum til að vinna þennan titil á móti flottu Víkingsliði. Ef það tekst þá verðum gríðarlega ánægðir."

Víkingar eru á toppi Bestu deildarinnar og þeir eru búnir að vera handhafar Mjólkurbikarsins í meira en 1400 daga.

„Það skiptir mig svo sem engu máli. Við mætum góðu liði. Við erum búnir að skoða þá vel og við vitum hvar við getum meitt þá. Við vitum hvað við þurfum að undirbúa okkur vel. Leikplanið er klárt og svo er það að mæta leikinn með sigurhugarfar," sagði Hallgrímur.„Við þekkjum Víking vel en við erum búnir að spila á móti mörgum góðum liðum í sumar. Við vitum hvar við getum meitt þá og ætlum að reyna að gera það á laugardaginn."

Hallgrímur býst við góðum stuðningi á vellinum á laugardaginn, um 1500 KA-mönnum. „Vonandi getum við gefið þeim æðislegan dag."

Leikplanið klárt fyrir laugardaginn - ,,Við vitum hvar við getum meitt þá"

Nikolaj Hansen: Stefnum á að halda bikarnum í 300 daga í viðbót „Ég er gríðarlega spenntur. Þetta er skemmtilegur leikur að spila," segir Nikolaj Hansen, fyrirliði Víkinga, fyrir bikarúrslitaleikinn gegn KA á laugardaginn.

Nikolaj er farinn að þekkja það vel að spila í bikarúrslitaleiknum en hann hefur núna verið hluti af sigurliðinu í Mjólkurbikarnum þrisvar sinnum.

„Ég held að þú verðir ekki vanur þessari tilfinningu. Þú þarft að vera spenntur og með smá í maganum þegar þú ferð inn á völlinn. Þú verður líka að njóta þess að spila svona leiki."

Hann býst við erfiðum leik gegn KA og segir þá erfitt lið að spila gegn. Nikolaj segir að strákarnir vilji fylgja á eftir stelpunum í Víkingi með því að vinna Mjólkurbikarinn.

„Já, klárlega. Þær eru búnar að eiga stórkostlegt tímabil og vinna allt. Þær eiga mikið hrós skilið. Við vinnum vonandi tvennuna og þá getum við fagnað vel eftir tímabilið."

Var hann að búast við því fyrir tímabilið að Víkingar myndu eiga eins gott tímabil og þeir hafa átt?

„Við höfum sýnt það síðustu ár að liðið okkar er mjög gott og okkur finnst gaman að vinna allt. Þetta ár hefur verið algjörlega frábært. Liðsframmistaðan og allt saman hefur verið mjög gott."

Víkingar hafa verið bikarmeistarar í meira en 1400 daga. Hvað gerir Víking að svona miklu bikarliði?

„Mér finnst við vera góðir í þessum erfiðu leikjum. Þessi bikarkeppni hefur verið frábær fyrir okkur. Ég held að við vinnum á laugardaginn og við stefnum á að halda bikarnum í 300 daga í viðbót."

Nikolaj Hansen: Stefnum á að halda bikarnum í 300 daga í viðbót

Ásgeir Sigurgeirs: Síðustu daga hefur þetta verið að stigmagnast „Þetta er leikur sem við höfum beðið lengi eftir," sagði Ásgeir Sigurgeirsson, leikmaður KA, þegar Fótbolti.net ræddi við hann í dag.

Á laugardaginn spilar KA við Víking í úrslitaleik Mjólkurbikars karla. Þetta er fyrsti úrslitaleikur KA síðan 2004 og það er mikil tilhlökkun innan félagsins og hjá stuðningsmönnum.

„Það er komin mikil tilhlökkun," segir Ásgeir en hefur biðin eftir leiknum verið löng?

„Já og nei. Það hefur verið nóg að gera í millitíðinni. Það voru hlutir sem maður gat gleymt sér við. Stemningin í félaginu er geggjuð. Síðustu daga hefur þetta verið að stigmagnast. Við sjáum vonandi sem flesta Akureyringa á vellinum á laugardaginn."

KA missti af dögunum af sæti í efri hluta Bestu deildarinnar.

„Það voru auðvitað vonbrigði en við erum búnir að hrista það af okkur. Við stefnum á sigur á laugardaginn. Þetta er stærsti leikur ársins á Íslandi. Ef við vinnum leikinn, þá verður sumarið alltaf jákvætt," segir Ásgeir.


„Við þurfum bara að spila okkar leik og við megum ekki sýna þeim of mikla virðingu. Veðrið og aðstæður munu kannski hafa þannig áhrif á leikinn að menn geta ekki spilað sinn vanalega fótbolta. Það riðlar okkar skipulagi og þeirra. Við þurfum að nýta okkur veikleika í þeirra leik."

Ásgeir Sigurgeirs: Síðustu daga hefur þetta verið að stigmagnast

Arnar Gunnlaugs: Tottenham er frábært lið sem vinnur aldrei neitt „Þetta er allavega mjög góð tilfinning að venjast. Það er ekkert eðlilega gaman að mæta hérna á hverju ári. Þetta er alveg ótrúlegt," segir Arnar Gunnlaugsson, þjálfari Víkinga.

Víkingar hafa verið bikarmeistarar síðan 2019, í 1461 dag. Á laugardag munu þeir reyna að halda bikarnum í eitt til viðbótar þeir mæta KA á Laugardalsvelli.

„Við erum mjög auðmjúkir að taka þátt í þessu aftur. Strákarnir líka. Þetta er dagur sem við ætlum að njóta í botn, ég hef alltaf gert það. Við byrjum snemma og vöknum með bros á vör, svo er hádegismatur með staffinu mínu og svo er það Laugardalsvöllurinn. Þetta er geggjaður dagur í alla staði. Hann er reyndar kannski bara geggjaður þegar þú vinnur. Það er örugglega mjög svekkjandi að vera á hinum endanum."

„Þegar þú vinnur fyrsta titilinn 2019 þá heldur þú að þetta tækifæri komi aldrei aftur. Og ég meina það innilega. Það er svo stórt að vinna titil. Það er fullt af toppþjálfurum og toppliðum sem hafa aldrei unnið titil. Ég var einmitt að grínast með það í morgun að það er lið á Englandi, Tottenham Hotspur, sem einn bróðir minn er það óheppinn að halda með. Það er frábært lið sem vinnur aldrei neitt."

„Þetta eru forréttindi. Svo verður maður bara gráðugur, þú vilt vinna aftur og aftur. Ég er heppinn að vinna hjá frábæru félagi sem fær frábæra leikmenn sem eru jafn hungraðir og ég sjálfur. Svo koma stuðningsmennirnir á bak við þetta og þeir vilja ekki vera heima í sófanum sama hvernig viðrar. Þetta eru algjör forréttindi og ekkert sem við tökum sem sjálfsögðum hlut."

Arnar Gunnlaugs:Tottenham er frábært lið sem vinnur aldrei neitt

Heiðursgestur KA Þorsteinn Már Baldvinsson forstjóri Samherja verður heiðursgestur KA á úrslitaleik Mjólkurbikars karla í dag.

Þorsteinn Már forstjóri Samherja heiðursgestur á bikarúrslitaleiknum

Helgi Mikael Jónasson verður með flautuna Það mun falla í hlut Helga Mikaels Jónassonar að dæma þennan leik. Þetta er fyrsti bikarúrslitaleikurinn sem Helgi Mikael dæmir á sínum dómaraferli.

Pétur Guðmundsson er fjórði dómari leiksins. Egill Guðvarður Guðlaugsson og Bryngeir Valdimarsson eru aðstoðardómarar.

Þá er búið að kasta upp á það á hvaða mark yrði sparkað ef til vítaspyrnukeppni kemur.

Þetta var gert til þess að flýta fyrir en markið sem verður sparkað á er markið sem er við Laugardalslaugina. Stuðningsmenn KA verða í þeim hluta stúkunnar.

Heil og sæl! Verið hjartanlega velkominn í þessa þráðbeinu textalýsingu frá úrslitum Mjólkurbikars karla þar sem ríkjandi bikarmeistarar í Víking freista þess að verja bikarmeistaratitilinn gegn KA.