Bochum er búið að vippa sér úr fallsæti í efstu deild þýska boltans eftir frábæran sigur gegn Hoffenheim í kvöld.

Austurríski miðjumaðurinn Kevin Stöger kom Bochum yfir í fyrri hálfleik og tvöfaldaði Felix Passlack forystuna í uppbótartíma fyrri hálfleiks.

Bochum var sterkara liðið í fyrri hálfleik og verðskuldaði að leiða viðureignina, en gestirnir frá Hoffenheim voru óheppnir að skora ekki mark.

Heimamenn héldu áfram að sækja í sig veðrið í síðari hálfleik og skoraði Stöger þriðja mark leiksins á 64. mínútu og hélt að hann væri þar með búinn að innsigla sigurinn, en Andrej Kramaric var ekki á sama máli.

Króatíski framherjinn skoraði tvennu á lokakaflanum en hún dugði þó ekki til, þar sem lokatölur urðu 3-2.

Bochum er þremur stigum frá fallsæti eftir þennan sigur á meðan Hoffenheim missti af kjörnu tækifæri í baráttunni um Evrópusæti. Þetta getur reynst afar dýr tapleikur fyrir Hoffenheim, sem er í harðri baráttu við Freiburg og Augsburg um sæti í Evrópu.