Þýski markvörðurinn Loris Karius yfirgefur Newcastle United í sumar þegar samningur hans við félagið rennur út en þetta segir Fabrizio Romano á X.
Karius kom til Newcastle United á frjálsri sölu fyrir tveimur árum eftir að hafa verið á mála hjá Liverpool.
Á þessum tveimur árum hefur hann aðeins spilað tvo leiki. Fyrsti leikur hans fyrir félagið var í úrslitaleik enska deildabikarsins á síðasta ári, en Nick Pope var í banni á meðan Martin Dubravka mátti ekki spila leikinn.
Karius gerði vel í leiknum og varði átta skot. Fékk hann mikið hrós fyrir þrátt fyrir 2-0 tap.
Annar leikurinn sem hann spilaði var í 4-1 tapinu gegn Arsenal í deildinni í febrúar og var það líklega hans síðasti leikur því hann mun yfirgefa Newcastle í sumar þegar samningur hans rennur út.
Fabrizio Romano greinir frá þessu á X en ekki er ljóst hvert hann mun fara. Karius er í sambandi með ítölsku íþróttafréttakonunni Diletta Leotta og eiga þau barn saman, því gæti hugur hans leitað til Ítalíu.
Athugasemdir