SKÝRSLAN: Jeppadagar á Ásvöllum
Hvað réði úrslitum?
Gæði Skagamanna umfram gæði Haukamanna.
Bestu leikmenn
1. Arnar Már Guðjónsson
Einn af betri miðjumönnum í Inkasso-deildinni. Mikil yfirvegun á miðjunni og stjórnaði hann bæði varnar og sóknarleik Skagamanna. Lagði upp mark og átti tvö stórhættuleg skot utan teigs.
2. Þórður Þorsteinn Þórðarson
Var hættulegur í hægri bakvarðarstöðunni. Átti fjöldan allan af sendingum bæði innfyrir vörn Hauka sem og hættulegar hornspyrnur þar sem Skagamenn skoruðu uppúr einni af þeim.
Atvikið
Aron Freyr Róbertsson gekk í raðir Hauka frá Keflavík seint í gærkvöldi. Eftir eina æfingu fór Aron beint í byrjunarlið Hauka og kom hann liðinu yfir strax á 8. mínútu leiksins. Ágætis byrjun hjá drengnum hjá nýju liði.
Hvað þýða úrslitin?
Taphrina Hauka heldur áfram. Fimmta tapið í röð og er liðið áfram í mikilli fallbaráttu ásamt þónokkrum liðum. Skagamenn halda 2. sætinu og verða í toppbaráttunni til loka.
Vondur dagur
Sóknarleikur Hauka bauð varla upp á neitt allan leikinn. Fyrsta markið var gjöf frá Arnór Snæ varnarmanni ÍA. Eftir það bauð sóknarleikur Hauka góða nótt og svaf værum blundi allan leikinn.
Dómarinn - 5
Erfiðleikastigið í þessum leik var ekki það mikið að það var algjör óþarfi fyrir Jóhann Inga dómara leiksins og aðstoðarmenn hans að missa tökin. Alltof mörg spjöld litu dagsins ljós og jafnvel á kolröngum tíma þegar út í það er farið.