SKÝRSLAN: Silfurskeiðin sér hörkutækifæri á tvöföldu gulli
Hvað réði úrslitum?
Löngun Stjörnuliðsins var bersýnileg frá fyrstu mínútum. Liðið byrjaði mun betur í leiknum og var yfir á nær öllum sviðum í fyrri hálfleik. Blikar náðu betri takti eftir hlé og fengu sín færi en Stjarnan hélt út.
Bestu leikmenn
1. Hilmar Árni Halldórsson - Stjarnan
Stoðsendingar í báðum mörkum Stjörnunnar. Geggjuð aukaspyrna og svo fór hann illa með Hendrickx.
2. Haraldur Björnsson - Stjarnan
Tók öflugar vörslur á mikilvægum augnablikum.
Atvikið
Halli Björns gerði mistök á 63. mínútu og gaf Breiðabliki dauðatækifæri til að jafna í 2-2. Eftir herfilega sendingu út úr markinu bjargaði Halli eigin skinni. Heilt yfir mjög flottur leikur hjá honum.
Hvað þýða úrslitin?
Breiðablik tapar tveimur \"úrslitaleikjum\" með nokkurra daga millibili og allt stefnir í einvígi milli Stjörnunnar og Vals um Íslandsmeistaratitilinn. Liðin eigast við á miðvikudaginn.
Vondur dagur
Jonathan Hendrickx leit hrikalega út í sigurmarki Stjörnunnar, Hilmar Árni fór illa með hann. Hendrickx átti ekki góðan dag og virkaði oft ragur. Gísli Eyjólfs fann sig ekki og Arnþór Ari var slakur.
Dómarinn - 6
Alls ekki gallalaus frammistaða og mögulega hefði mark Blika ekki átt að standa. En hann hafði þokkaleg tök á erfiðum leik.