SKÝRSLAN: Sigurganga Selfyssinga heldur áfram
Hvað réði úrslitum?
Eftir jafnan fyrri hálfleik braut Hólmfríður Magnúsdóttir ísinn í upphafi síðari. Eftir það var Selfoss mikið betri aðilinn í leiknum og sjálfstraustið skein af leikmönnum. Voru alltaf líklegri að bæta við heldur en Stjarnan að jafna. Virkilega sterk frammistaða hjá öllum leikmönnum Selfoss skilaði góðum þremur punktum í kvöld.
Bestu leikmenn
1. Hólmfríður Magnúsdóttir
Sennilega ekki hægt að finna nógu sterkt lýsingarorð yfir Hólmfríði síðan að hún hóf að spila með Selfyssingum. Hefur gjörbreytt sóknarleik liðsins. Kom Selfyssingum á bragðið í upphafi síðari hálfleiks og bætti síðan við skallamarki undir lok leiksins.
2. Grace Rapp
Frábær á miðjunni fyrir framan Karitas og Þóru. Er með góða yfirsýn og átti margar lykilsendingar sem að skiluðu góðum færum. Hefur verið ein af betri leikmönnum liðsins í sumar. Fær ekki það credit sem hún á skilið.
Atvikið
Magdalena Anna Reimus skoraði sitt fyrsta mark fyrir Selfoss í sumar þegar hún kom Selfyssingum í 2-0 um miðjan síðari hálfleik. Hefur ekki náð sér almennilega á strik í sumar en það eru frábærar fréttir fyrir Selfyssinga ef að hún er að hrökkva í gang.
Hvað þýða úrslitin?
Selfyssingar sigra sinn þriðja deildarleik í röð og fjórða í öllum keppnum. Virðast óstöðvandi. Vandræði Stjörnunnar halda áfram. Liðið hefur ekki skorað síðan í lok maí og Selfyssingar eru nú með sex stigum fleiri en Garðabæjarliðið.
Vondur dagur
Camille Elizabeth Bassett og Shameeka Fishley voru að spila sinn fyrsta leik fyrir Stjörnuna í dag. Bættu afskaplega litlu við og voru áhorfendur stærstan hluta leiksins. Verður að koma meira frá þeim.
Dómarinn - 8,5
Lítið sem ekkert hægt að setja út á frammistöðu Helga og hans manna í kvöld. Flott frammistaða.