Fotbolti.net
Hafliði Breiðfjörð
Hafliði Breiðfjörð
Pepsi Max-deild karla
Origo völlurinn
Geggjað veður, 12 stiga hiti, logn og sól. Svona var sumarið 2019.
Valur
Valur
2 - 0
HK
HK
Andri Adolphsson 17'1 - 0Patrick Pedersen 45'2 - 064' Guðmundur Þór Júlíusson
Dómari: Ívar Orri Kristjánsson
Áhorfendur: 784

SKÝRSLAN: Hannes bjargaði hripleku Valsliði

Hvað réði úrslitum?

Það má alveg segja að úrslitin hafi verið ósanngjörn. Leikmenn HK fóru í gegnum varnarleik Vals sem var eins og gatasigti en Hannes Þór Halldórsson varði eins og berserkur og í raun réði hann úrslitum í dag.

Bestu leikmenn

1. Hannes Þór Halldórsson, Valur

Það var virkilega ánægjulegt að sjá Hannes klára tímabilið með þvílíkum klassa leik. Það styttist í mikilvæga landsleiki gegn Heimsmeisturum Frakka og Andorra og ef hann verður í svona stuði getum við látið okkur hlakka til.

2. 2. Patrick Pedersen, Valur

Patrick er einstaklega góður leikmaður. Var vinnusamur í dag og skoraði mark. Langaði greinilega mikið að fá eitthvað út úr leiknum og þrátt fyrir að meiðast undir lok fyrri hálfleiks harkaði hann af sér, hélt sér á hreyfingu allan hálfleikinn og hélt áfram.

Atvikið

Þegar fjölmiðlamönnum var afhent leikskýrsla á Origo-vellinum klukkustund fyrir leik var búið að fylla út öll nöfn leiksins nema þjálfarateymi Vals. Hvort þetta hafi mátt túlka sem einhvers konar yfirlýsingu eða bara mjög óheppilega handvömm verður ósagt látið en nöfnum Óla Jó, Sigurbjörns Hreiðarssonar, Kristófers Sigurgeirssonar og Rajko Stankovic var bætt á skýrsluna skömu fyrir leik. Eftir leik var svo tilkynnt að Óli sé hættur þjálfun liðsins, fékk ekki endurnýjun á samningi.

Hvað þýða úrslitin?

Þessi úrslit hafa litla þýðingu enda höfðu liðin ekki að miklu að keppa. Valur endaði mótið í 6. sæti með 29 stig en HK tveimur stigum neðar í 9. sæti.

Vondur dagur

Greyið Guðmundur Þór Júlíusson fær þennan lið í dag. Hann var á leið í Pepsi Max-deildina með HK síðasta haust en sleit krossband í einum af fyrstu æfingaleikjum vetrarins. Þar með varð tímabilið ónýtt og hann spilaði ekki leik. Hann var samt fyrirliði liðsins og fékk hlutverk sem liðsstjóri í sumar. Hann brást reiður við röngum dómi í leiknum og lét í sér heyra, virtist komast upp með það þegar Þjóðólfur Gunnarsson sá rauða spjaldið fyrir en fjórði dómari fattaði mistökin og lét vísa Guðmundi af svæðinu. Þetta þýðir að þegar hann er loks klár í Pepsi Max-deildina næsta sumar byrjar hann tímabilið í leikbanni.

Dómarinn - 4

Mér fannst Ívar Orri lélegur í þessum leik. Ég reyni að vera sanngjarn í þessum lið þegar ég skrifa skýrslur en menn verða líka að vinna sér inn fyrir hrósinu og hann gerði það ekki í dag. Sem dæmi verð ég að benda á að mér finnst óskiljanlegt hvernig hægt er að horfa í hina áttina þegar leikmenn á spjaldi brjóta af sér bara til að sleppa því að lyfta rauðu. Þetta kom líka illa í bakið á Ívari Orra þegar Andri Adolphsson hrinti Atla Arnarsyni í bræðiskasti og Ívar ákvað að gera EKKERT. Ekki rautt spjald og ekki einu sinni gult sem hefði orðið seinna gula Úr varð farsi þar sem hann gaf tveimur liðsstjórum HK rauða spjaldið en hætti svo við annað þeirra.
Fotbolti.net

© Copyright 2002-2026 Fotbolti.net / Fotbolti Ehf. All rights reserved.