SKÝRSLAN: Víkingskonur með sterkan sigur á Grindavík
Hvað réði úrslitum?
Víkingskonurnar byrjuðu leikinn af krafti og pressuðu út um allan völl sem leiddi til mistaka á miðsvæði Grindavíkur. Svo skora þær á ,,besta tíma" eins og sagt er, rétt fyrir hálfleik. Grindavík spilaði mikið betur meginþorra seinni hálfleiks en Andrea í marki Víkinga varði og varði.
Bestu leikmenn
1. Svanhildur Ylfa Dagbjartsdóttir
Hún var gersamlega frábær í dag og hljóp stanslaust upp og niður kantinn og skoraði fyrsta mark leiksins.
2. Hulda Ösp Ágústsdóttir
John þjálfari virtist hafa lagt upp með að keyra á bakverðina og nýta kantmennina. Það gekk heldur betur upp. Hulda sýndi og sannaði að hún er frábær leikmaður og skoraði frábært skallamark.
Atvikið
Að sjá Svanhildi blómstra eftir að hafa byrjað á bekknum í leiknum á undan. Fyrsta markið hennar var flott og svo var hún vinnusöm um allan völl.
Hvað þýða úrslitin?
Þetta voru virkilega stór úrslit fyrir Víking sem kom sér aftur á beinu brautina eftir grátlegt tap gegn FH. Liðið er því komið upp í 4. sætið með 6 stig en búið að spila þrjá leiki.
Hins vegar voru þetta svekkjandi úrslit fyrir Grindavík sem halda 5. sætinu eins og er með 3 stig en búnar að spila þrjá leiki.
Vondur dagur
Miðsvæði Grindavíkur hlýtur þennan titil. Þær virtust ekki vera á sömu blaðsíðunni og gáfu boltann frá sér trekk í trekk.
Dómarinn - 9
Ekkert við dómarann að sakast í þessum leik. Þetta var tiltölulega auðveldur leikur að dæma og leyfði leiknum að fljóta.