SKÝRSLAN: Lykilatriði að brjóta ísinn snemma
Hvað réði úrslitum?
Þór/KA ætlaði að koma hingað, halda skipulagi og halda núllinu eins lengi og þær gætu. Það plan fór út um gluggann strax í upphafi leiks. Ef þú ert 2-0 undir gegn Val eftir tíu mínútur þá verður þetta alltaf erfitt. Valur braut ísinn snemma og það var lykilatriði fyrir þær. Að lokum frekar þægilegur sigur toppliðsins.
Bestu leikmenn
1. Þórdís Hrönn Sigfúsdóttir (Valur)
Skoraði tvö og var óheppin að fullkomna ekki þrennuna.
2. Lára Kristín Pedersen (Valur)
Flottur leikur á miðsvæðinu. Sendingin í fyrsta marki leiksins var ótrúlega flott hjá henni.
Atvikið
Fyrsta markið sem Þórdís Hrönn skorar. Þessi leikur hefði getað þróast allt öðruvísi ef ísinn hefði ekki brotnað strax í upphafi leiks. Við sáum það á Akureyri fyrr á tímabilinu þegar þessi lið mættust hversu hættulegur andstæðingur Þór/KA getur verið ef þú leyfir þeim að vinna sig inn í leikinn.
Hvað þýða úrslitin?
Valur er með fimm stiga forskot á toppi deildarinnar, en Blikar geta aftur minnkað það niður í tvö stig með sigri á Keflavík á morgun. Þór/KA er í harðri fallbaráttu, með jafnmörg stig og KR sem er í níunda sæti.
Vondur dagur
Mér fannst eins og Harpa í marki Þórs/KA hefði getað gert mun betur í allavega öðru markinu. Annars var þetta ekki sérstakur dagur hjá framherjum Þórs/KA sem fengu ekki úr miklu að moða.
Dómarinn - 7,5
Auðveldur leikur að dæma og hann kom sér vel frá þessu.