SKÝRSLAN: Þrjú stig í Laugardalinn
Hvað réði úrslitum?
Þróttur var heilt yfir sterkara liðið stærsta hluta leiksins. Afturelding átti fína kafla inn á milli en tókst ekki að skora. Það stefndi lengi vel í markalaust jafntefli en þegar Þróttur náði marki inn á 74. mínútu þá var þetta aldrei spurning.
Bestu leikmenn
1. Murphy Alexandra Agnew (Þróttur R.)
Mikill kraftur í henni og var allt í öllu í sóknarleik Þróttar. Gerði gríðarlega vel í fyrra marki Þróttar þegar hún hóf sóknina og kláraði hana svo með marki. Átti svo hornspyrnuna sem skilaði seinna markinu og kláraði leikinn.
2. Ólöf Sigríður Kristinsdóttir (Þróttur R.)
Var mikið að búa til fyrir liðsfélaga sína og var einhvern veginn alltaf í boltanum. Ótrúlega sterk og sýndi gæðin sem hún býr yfir í þessum leik.
Atvikið
Fyrra mark Þróttar sem braut ísinn. Afturelding voru búnar að verjast vel allan leikinn og fá tækifæri til að skora en þegar þetta mark kom þá var lítið sem benti til þess að þær kæmu til baka.
Hvað þýða úrslitin?
Þróttur fer upp í 4. sætið með 19 stig, einu stigi meira en ÍBV en fjórum stigum á eftir Stjörnunni. Afturelding er áfram í botnsætinu með 6 stig, stigi á eftir KR en fjórum stigum frá öruggu sæti.
Vondur dagur
Engin ein sem hægt er að pikka út, en nýju erlendu leikmenn Aftureldingar voru ekki með neina sýningu í þessum leik. Victoria átti þó nokkra góða spretti í fyrri hálfleik. Tökum samt inn í myndina að þær eru nýkomnar til landsins og hafa ekki haft mikinn tíma með liðinu. Vonandi eru þetta leikmenn sem geta hjálpað Aftureldingu að sækja stig.
Dómarinn - 7.5
Fín frammistaða. Ekki erfiðasti leikurinn að dæma.