SKÝRSLAN: The Ari Sigurpáls show
Hvað réði úrslitum?
Eflaust þessi tveggja mítútna kafli í seinni hálfleik þar sem Víkingar gera út um leikinn með tveimur mörkum. En hins vegar bjargar Gunnar Vatnhamar tvisvar sinnum á línu og Breiðablik skoruðu mark í fyrri hálfleik sem hefði mögulega átt að standa.
Bestu leikmenn
1. Ari Sigurpálsson
Eftir að hafa fengið að spila lítið á síðustu leiktíð steig hann svo sannarlega upp í kvöld. Geggjaður og skoraði tvö stórglæsileg mörk og fékk heiðurskiptingu. Þú getur ekki beðið um neitt mikið meira í stórleik ársins.
2. Gunnar Vatnhamar
Mér finnst erfitt að velja einhvern hér en eftir að hafa pælt aðeins í þessu fær Gunnar Vatnhamar þetta. Hann stóð sig frábærlega að mínu mati og bjargar einnig tvisvar sinnum á línu í stöðunni 2-1 og síðan alveg í lokin. Sá hefur reynst Víkingum vel maður minn lifandi.
Atvikið
Það er úr mörgu að velja en ég verð að velja seinna markið hans Ara Sigurpáls sem gerir út um leikinn. Keyrir upp með boltann og tekur skotið fyrir utan teig sem syngur í netinu. Stórglæsileg afrgreiðsla og nánast eins og fyrsta markið hans líka.
Hvað þýða úrslitin?
Víkingar eru einir á toppnum og með fullt hús stiga á meðan Breiðablik tapar sínum fyrsta deildarleik í ár.
Vondur dagur
Erfitt að segja. Held að Höskuldur hafi ekki átt góðan dag. Gerir skelfileg mistök í fyrsta marki leiksins þar sem hann á misheppnaða hreinsun. Einnig voru stuðningsmenn Víkinga duglegir að gelta á hann þegar hann fékk boltann. En það er erfitt að kenna honum um tapið eða hin mörkin.
Dómarinn - 8
Fannst hann dæma þennan leik mjög vel. Þetta eru leikirnir sem er eflaust erfiðast að dæma í. Nokkur atvik samt þar sem mér fannst hann átt að flauta en kannski var það bara línan sem hann var búin að setja fyrir leik. Bara rock solid leikur hjá dómarateyminu fannst mér.