SKÝRSLAN: Út í veður og vind
Hvað réði úrslitum?
Veðrið setti mark sitt á leikinn í dag. Það hvessti þó nokkuð allan leikinn og leiðinleg rigning á köflum. Menn voru mikið að renna til í grasinu og þar fram eftir götunum. Þetta hafði sín áhrif á sóknarleik beggja liða í dag fannst mér.
Bestu leikmenn
1. Arnór Gauti Úlfarsson
Stóð sína plikt vel í vörninni í dag. Átti líka nokkrar fínar langar sendingar í leiknum. Hann getur verið sáttur við sína frammistöðu í dag.
2. Elmar Þór Jónsson
Annar varnarmaður sem fær þessa nafnbót í dag. Fannst Elmar einnig standa sig vel í dag. Einnig kom Fannar Daði til greina en hann spilaði einungis fyrri hálfleikinn þannig læt Elmar fá þetta frekar.
Atvikið
Á 84. mínútu hleypur Aron út í enda teigsins til þess að handsama lausan bolta. Hann kastar sér á boltann og grípur hann en rennur nokkuð langt og þarf að sleppa taki á boltanum áður en hann rennur út úr vítateignum. Sýndist hann sleppa boltanum á réttum tíma en þetta var á tæpasta vaði.
Hvað þýða úrslitin?
ÍR fer upp í 5. sæti deildarinnar á meðan Þór fer upp í 8. sætið. Mögulega breytist þetta eitthvað seinna í kvöld eftir síðustu tvo leiki umferðarinnar.
Vondur dagur
Vindurinn lék okkur illa í dag sem hafði sín áhrif á gæði leiksins. Fannst enginn leikmaður eiga framúrskarandi frammistöðu í dag og ég kenni veðrinu um það. Nokkrar fínar frammistöður en annars var þetta flestallt undir pari að mínu mati.
Dómarinn - 7
Fín frammistaða hjá dómarateyminu og ekkert sem ég er mjög ósammála.