SKÝRSLAN: Afturelding rís upp töfluna
Hvað réði úrslitum?
Afturelding byrjaði leikinn ekki vel og Skagamenn hefðu hæglega getað skorað fleiri mörk í upphafi. Elmar Kári skorar hinsvegar gjörsamlega stórkostlegt mark til að jafna leikinn og eftir það var allt momentum með Aftureldingu sem gengu á lagið og skoruðu fleiri mörk.
Bestu leikmenn
1. Benjamin Stokke
Skorar eitt mark og leggur upp önnur tvö. Markið sem Hrannar skorar kemur upp úr algjöru augnakonfekti af sendingu frá Norðmanninum.
2. Elmar Kári Enesson Cogic
Elmar kemur sér loks á blað í deildinni eftir brösuga byrjun. Sífellt ógnandi þess utan og hefði getað skorað fleiri mörk.
Atvikið
Jöfnunarmarkið. ÍA höfðu byrjað betur og virtust ætla að vinna leikinn en þá kemur Elmar með gjörsamlega stórkostlegt mark, jafnar leikinn og hleypir lífi í sína menn.
Hvað þýða úrslitin?
Afturelding fer upp í 7. sætið en áfram sitja ÍA á botninum og áhyggjurnar fara að aukast.
Vondur dagur
Jón Þór Hauksson er með Skagamenn í neðsta sæti. Mikil vonbrigði og hlutirnir verða að fara snúast við ef ekki á illa að fara.
Dómarinn - 8
Sigurður Hjörtur flottur í dag, vítadómurinn var réttur þó Hrannar hafi gert mikið úr þessu.