SKÝRSLAN: Atvinnumennskan kallar
Hvað réði úrslitum?
Þórsarar voru heilt yfir betra liðið á vellinum og verðskulduðu sigurinn, byrjuðu báða hálfleikana betur og lokakaflinn í lok fyrri hálfleiks skóp sigurinn. Völsungar fengu færi, hefðu getað fengið fleiri vítaspyrnur, en gerðu ekki nóg til að verðskulda stig. Leikurinn var virkilega skemmtilegur, aðstæður á Húsavík geggjaðar; nýtt gervigras sem hélst rakt yfir leikinn.
Bestu leikmenn
1. Einar Freyr Halldórsson
Verður 17 ára, já 17 ára, eftir rúman mánuð. Gjörsamlega magnaður leikmaður sem ég á erfitt með að sjá Þór halda í vetur. Tempóstjóri á miðjunni og spilar miklu frekar eins og hann sé 26 ára en ekki 16. Minnir mig smá á Birki Heimisson 2016, einfaldlega sést að framtíð hans er erlendis. Ég eiginlega efast um að Besta deildin verði hans svið á næsta ári jafnvel þó að Þór færi upp, en leyfum framtíðinni að ráða því. Átti þátt í fyrstu þremur mörkum Þórs, skoraði það þriðja með stórglæsilegri aukaspyrnu.
2. Ibrahima Balde
Enginn í deildinni á séns í Balde, líkamlegir yfirburðir og gæði með boltann. Markið hans frábært. Yann Affi gerði einnig tilkall, sá hefur snúið við blaðinu eftir hörmungarbyrjun.
Atvikið
Tvö heimsklassa mörk skoruð í lok fyrri hálfleiks sem höfðu mikil áhrif á leikinn. Frábær skot hjá Balde og Einari.
Hvað þýða úrslitin?
Fyrsta sinn í sumar sem Þór vinnur þrjá leiki í röð og Þórsarar komnir upp í 2. sætið. Fjögur stig eru upp í topplið Njarðvíkur og Völsungur er sjö stigum fyrir ofan fallsæti þegar fimm umferðir eru eftir.
Vondur dagur
Juan Guardia er fyrsta nafnið sem kemur upp hjá mér, átti erfitt uppdráttar gegn sínum fyrrum félögum, virkaði stressaður. Ívar var svo eitthvað furðulegur í fyrsta marki Þórs, spurning svo með fjórða og jafnvel fimmta markið líka.
Dómarinn - 3
Þetta var alls ekki gott hjá Sigga og teyminu, mjög skrítin lína varðandi hvenær brot var dæmt og svo hvenær gulu var lyft. Hrós á að brotin sem voru dæmd voru færri en hefðu getað verið dæmd, en bæði lið gerðu mjög sterkt tilkall til að fá víti sem ekki voru dæmd. Fannst dómgæslan ekki halla svakalega á annað hvort liðið, en bæði lið voru ósátt við störf dómaranna.