Þróttarar áttu betri leik en ÍR heilt yfir. Það var ekki mikið um færi í fyrri hálfleik en þó nóg til þess að bæði lið hefðu getað skorað. Svo þegar komið var inn í seinni hálfleikinn þá nýttu Þróttarar breiddina sem þeir hafa í fremstu stöðum. Byrjunarliðið var búið að vera þreyta ÍR-ingana allan leikinn og þá koma Vilhjálmur Kaldal og Viktor Andri af bekknum, vel ferskir og klára Breiðhyltinga.

Annað mark Þróttara var verðskuldað og virkilega vel gert. Frábær sending hjá Vilhjálmi á Viktor sem kláraði svo vel. ÍR-ingar reyndu að koma til baka eftir þetta en það var aldrei líklegt. Þetta mark skóp sigurinn fyrir Þróttara.

Þróttur er í fjórða sæti deildarinnar einu stigi á eftir ÍR og Þór sem eru í næstu tveimur sætunum. Það eru svo fimm stig upp í topp lið Njarðvíkur. Fimm leikir eftir og Þróttur á Njarðvík næst sem gæti reynst lykil leikur í toppbaráttunni. Þá á ÍR, Þór næst sem er einnig risa leikur í þessari baráttu.

Bergvin Fannar Helgason fékk allavega eitt frábært skallafæri sem hann hefði átt að skora úr. Hann fékk önnur skallafæri í leiknum sem voru ekki jafn góð, en hann hefði vel getað skorað úr þeim líka. Marc McAusland átti svo afmæli í dag, en það er ólíklegt að það verður einhver afmælisveisla í kvöld eftir að vörnin lét þrjú mörk leka inn.

Gunnar Oddur og hans teymi virkilega góðir í kvöld. Man eiginlega ekki eftir dóm sem ég var ósammála í fljótu bragði. Ekki erfiðasti leikurinn í heimi hins vegar.