Seiglan í Blikaliðinu skilaði þessum sigri í hús! Bara VÁ! Annar leikurinn í röð sem er spilaðu í miklum hita og fer líka í framlengingu. Þunnskipaður bekkur og lítil breidd. Agla María fékk hvíld í fyrri hálfleik og kom svo tvíefld inn á og átti þátt í öllum mörkum liðsins, klókt að eiga hana inni en mögulega væri ég að skrifa eitthvað annað ef það hefði ekki tekist.

Það eru nokkur góð atvik hérna! Koma tvisvar til baka og jafna, seinna markið á lokasekúndu uppbótartíma og tryggði Blikum framlengingu! Markið frá Öglu Maríu líka sem tryggði sigurinn er klárlega stórt atvik. Ég verð hins vegar að nefna það sem atvikið að atvinnumarkmaðurinn Taylor Kane kemur inn sem útileikmaður þar sem breiddin á bekknum er það lítil! Þetta er eitthvað sem er ótrúlegt að hafi gerst hjá Breiðablik! Og kannski sér kafli útaf fyrir sig hvernig stendur á því að Blikarnir mæta með 16 manna hóp í tvo mikilvæga Evrópuleiki?

Úrslitin þýða það einfaldlega að Evrópu ævintýri Breiðabliks heldur áfram og þær verða í pottinum þegar dregið verður í Evrópubikarnum.

Klárlega vondur dagur hjá Hanna Siniauskaya sem reif í hárið á Edith á 16. mínútu og uppskar fyrir það rautt spjald. Gerði það að verkum að hún skildi liðið sitt eftir í skít og þær þurftu að spila leikinn einum færri í 104 mínútur!

Aftasta lína Breiðabliks var þá einnig í miklu basli og veseni oft á tíðum, ítrekuð mistök, lélegar sendingar, hik og samskiptaleysi og þær eiginlega bara gáfu Pilipenko mörkin á silfurfati.

Vel dæmt hjá norska dómaranum Karoline Marie Jensen og hennar teymi. Hárréttar ákvarðanir, sérstaklega varðandi rauða spjaldið, hafði góð tök á leiknum en leyfði honum að fljóta vel.